رفاہ انٹرنیشنل یونیورسٹی کے گلبرگ گرینز کیمپس میں یَس پاکستان کے اشتراک سے ینگ سی ای اوز، انٹرپرینیورز اینڈ انوویٹرز سمٹ، ایکسپو اینڈ ایوارڈز 2026 کا انعقاد کیا گیا، جس میں نوجوان کاروباری رہنماؤں، انٹرپرینیورز اور جدت کاروں کی خدمات کو سراہا گیا۔
24 اکتوبر کو منعقد ہونے والی تقریب میں کاروباری شخصیات، ماہرین تعلیم، طلبہ اور مختلف شعبوں سے تعلق رکھنے والے نمائندوں نے شرکت کی۔ تقریب کا مقصد نوجوانوں کی کاروباری کامیابیوں کا اعتراف کرنے کے ساتھ تعلیمی اداروں اور صنعت کے درمیان روابط کو مضبوط بنانا تھا۔
تقریب میں ماریشس کے ہائی کمشنر منسو کُری مباکس، ہائر ایجوکیشن کمیشن کے سابق چیئرمین اور ایچ ای سی ٹاسک فورس کے سربراہ پروفیسر ڈاکٹر جاوید لغاری، ایچ ای سی کے اراکین ڈاکٹر حبیب بخاری، ڈاکٹر محمد شفیق اور ڈاکٹر ناصر محمود سمیت یَس پاکستان کے بانی محمد مرتضیٰ نور نے شرکت کی۔
اس موقع پر رفاہ انٹرنیشنل یونیورسٹی کے ڈپٹی وائس چانسلر برائے اکیڈمکس پروفیسر ڈاکٹر یاور حیات خان نے کاروباری سرگرمیوں، جدت اور صنعت و تعلیمی اداروں کے درمیان مضبوط شراکت داری کے فروغ کیلئے یونیورسٹی کے عزم کا اعادہ کیا۔
فیکلٹی آف مینجمنٹ سائنسز کے ڈین پروفیسر ڈاکٹر خرم شہزاد اور سینٹر فار انٹرپرینیورشپ اینڈ انٹرپرینیورشپ ڈیولپمنٹ کے چیئرمین ڈاکٹر امجد پرویز نے بھی خطاب کیا۔ مقررین نے نوجوانوں کو کاروباری مہارتیں فراہم کرنے اور انہیں آگے بڑھنے کے مواقع دینے کی اہمیت پر زور دیا۔
تقریب کا نمایاں حصہ ایوارڈز کی تقسیم تھا، جس میں نوجوان چیف ایگزیکٹوز، کاروباری افراد اور انوویٹرز کو ان کی کامیابیوں کے اعتراف میں اعزازات پیش کیے گئے۔
سمٹ کے دوران روزگار کے نئے مواقع پیدا کرنے، جدت کی حوصلہ افزائی اور پاکستان کی معاشی ترقی میں نوجوانوں کی قیادت میں قائم کاروباری اداروں کے کردار کو اجاگر کیا گیا۔ اس موقع پر شرکا کو باہمی رابطوں، علم و تجربات کے تبادلے اور کاروباری امکانات پر گفتگو کیلئے بھی پلیٹ فارم فراہم کیا گیا۔