مصنوعی ذہانت کے ذریعے گھر فروخت

فلوریڈا، امریکہ: آرٹیفیشل انٹیلی جنس ٹیکنالوجی پر مبنی چیٹ جی پی ٹی اب رئیل اسٹیٹ کے شعبے میں بھی اپنا اثر دکھا رہی ہے۔ امریکی شہری رابرٹ لیوین نے چیٹ جی پی ٹی کو اپنے گھر کو فروخت کرنے کے لیے استعمال کیا اور حیرت انگیز نتائج حاصل کیے۔

رابرٹ لیوین کے مطابق، انہوں نے چیٹ جی پی ٹی سے اپنے گھر کے لیے مارکیٹنگ مواد تیار کرنے، ممکنہ خریداروں سے رابطہ کرنے کے طریقے سیکھنے اور فروخت کے معاہدے کا مسودہ بنانے میں مدد لی۔ چیٹ جی پی ٹی کی مدد سے تیار کردہ اشتہار کے نتیجے میں پہلے 72 گھنٹوں میں انہیں پانچ پیشکشیں موصول ہوئیں اور گھر پانچ دن کے اندر فروخت ہوگیا۔

لیوین نے بتایا کہ اس عمل سے انہیں رئیل اسٹیٹ ایجنٹ کی کمیشن کی 3 فیصد بچت بھی ہوئی، جبکہ گھر کی فروخت بھی تیز اور مؤثر طریقے سے مکمل ہوئی۔ یہ مکان کوپر سٹی میں واقع تھا اور پچھلے 15 سال سے رابرٹ لیوین کا گھر تھا۔ انہوں نے اس تجربے کے ذریعے یہ جاننے کی کوشش کی کہ اے آئی کے استعمال سے گھر کی فروخت ممکن ہے یا نہیں۔

ماہرین کے مطابق، چیٹ جی پی ٹی جیسے AI ٹولز رئیل اسٹیٹ مارکیٹ میں روایتی ایجنٹس کے کام کو آسان بنانے کے ساتھ ساتھ وقت اور پیسے کی بچت بھی کر سکتے ہیں، اور مستقبل میں یہ شعبے میں تبدیلی کا سبب بن سکتے ہیں۔