.jpg)
ایک افغان جریدے نے حالیہ حملوں کے حوالے سے اہم انکشافات کرتے ہوئے دعویٰ کیا ہے کہ پاک فوج نے کارروائی کے دوران صرف افغان طالبان کی فوجی تنصیبات کو نشانہ بنایا۔
رپورٹ کے مطابق پاکستانی ذرائع نے بتایا کہ پیر کی شب کابل میں کیے گئے حملے میں کیمپ فینکس کے دائیں جانب موجود فتنہ الخوارج اور افغان طالبان کے ایک کیمپ کو نشانہ بنایا گیا۔
جریدے کا کہنا ہے کہ حملے کے بعد افغان طالبان کی جانب سے قریبی منشیات کے عادی افراد کے اسپتال کو آگ لگانے کا دعویٰ سامنے آیا، تاہم شائع ہونے والی تصاویر میں اسپتال کا سائن بورڈ برقرار جبکہ عمارت جلتی ہوئی دیکھی جا سکتی ہے۔
رپورٹ میں مزید کہا گیا ہے کہ طالبان نے دعویٰ کیا کہ اسپتال پر حملے میں سیکڑوں افراد ہلاک ہوئے، تاہم اس حوالے سے کوئی واضح شواہد یا بڑی تعداد میں لاشوں کی تصاویر سامنے نہیں لائی گئیں۔
جریدے کے مطابق طالبان میڈیا کی جانب سے جاری ایک ویڈیو میں زخمی شخص نے بھی بتایا کہ پاکستانی طیاروں نے منشیات کے عادی افراد کے کلینک سے تقریباً دو سو میٹر دور اہداف کو نشانہ بنایا۔
دفاعی تجزیہ کاروں کے مطابق یہ صورتحال مختلف دعوؤں اور حقائق کے درمیان تضاد کو ظاہر کرتی ہے، جس کے باعث خطے میں اطلاعاتی جنگ بھی شدت اختیار کرتی جا رہی ہے۔