.png)
اسلام آباد: وزیراعظم شہباز شریف نے کہا ہے کہ پاکستان کا چین کے ساتھ تعلق ہر حال میں غیرمتزلزل رہے گا اور پاکستان ایک چائنا پالیسی پر اپنے غیرمتزلزل عزم پر قائم ہے۔
وزیراعظم ہاؤس میں چین کی کمیونسٹ پارٹی کے بین الاقوامی شعبے کی نائب وزیر سن ہائی یان سے ملاقات میں وزیراعظم نے چینی مہمان اور ان کے وفد کو پاکستان میں خوش آمدید کہا۔ وزیراعظم نے اس دورے کو پاکستان اور چین کے سفارتی تعلقات کی 75ویں سالگرہ کے موقع پر نہایت اہم قرار دیا۔
وزیراعظم نے بتایا کہ رواں سال کا آغاز پاکستان کے نائب وزیراعظم اور وزیر خارجہ کے بیجنگ دورے سے ہوا، جس کے بعد وزیر داخلہ نے شنگھائی کا دورہ کیا، اور آئندہ میں اسپیکر قومی اسمبلی کے دورے کی توقع ہے۔
شہباز شریف نے کہا کہ پاکستان اور چین کے درمیان تعلق فولاد کی طرح مضبوط اسٹریٹجک تعاون پر مبنی ہے۔ انہوں نے چین کی جانب سے پاکستان کے لیے پاک-چین اقتصادی راہداری (CPEC) کے تحت تعاون کو سراہا اور سی پیک کے اگلے مرحلے کے بروقت اور مؤثر نفاذ کی ضرورت پر زور دیا۔
وزیراعظم نے صدر شی جن پنگ کو اس سال پاکستان کے سرکاری دورے کی دعوت بھی دی اور کہا کہ یہ سال دونوں ممالک کے لیے خصوصی اہمیت اور تاریخی سنگِ میل کی حیثیت رکھتا ہے۔
چینی نائب وزیر سن ہائی یان نے کہا کہ چین پاکستان کے ساتھ اپنے دیرینہ اور آزمودہ تعلقات کو مزید مضبوط بنانے کے لیے پرعزم ہے۔ انہوں نے پاکستان میں اقتصادی اور سیاسی استحکام کے لیے وزیراعظم کی کوششوں کو سراہا اور کہا کہ چینی قوم پاکستان کی سفارتی کامیابیوں پر فخر محسوس کرتی ہے۔
سن ہائی یان نے بتایا کہ کمیونسٹ پارٹی آف چائنا پاکستان کی مختلف سیاسی جماعتوں کے ساتھ بہترین تعلقات رکھتی ہے اور جماعتی سطح پر روابط کے ذریعے بین الجماعتی تعاون کو مزید مضبوط بنانے کے عزم پر قائم ہے۔