پی ٹی آئی چیئرمین گوہر علی خان: مذاکرات پر علیمہ خان کا موقف واضح، ملاقاتوں پر سیاست نہ ہونی چاہیے

پاکستان تحریک انصاف (پی ٹی آئی) کے چیئرمین بیرسٹر گوہر علی خان نے کہا ہے کہ مذاکرات کے معاملے پر علیمہ خان کا مؤقف سب کے سامنے ہے، تاہم وہ خود اس پر مزید بات نہیں کریں گے۔

منگل کو راولپنڈی میں میڈیا سے گفتگو کرتے ہوئے گوہر علی خان نے کہا کہ اگر محمود خان اچکزئی کے پاس مینڈیٹ موجود ہے تو وہ مذاکرات کر سکتے ہیں، کیونکہ بانی پی ٹی آئی عمران خان نے خود کہا تھا کہ مذاکرات محمود خان اچکزئی اور ناصر عباس کریں۔

خیال رہے کہ عمران خان کی ہمشیرہ علیمہ خان نے انسداد دہشت گردی عدالت راولپنڈی کے باہر کہا تھا کہ پارٹی میں جو بھی رہنما مذاکرات کی بات کرتا ہے، وہ نہ تو بانی پی ٹی آئی کے ساتھ ہے اور نہ ہی عمران خان کا ساتھی۔

بیرسٹر گوہر علی خان نے کہا کہ چاہے راستہ مزاحمت کا ہو یا مفاہمت کا، کسی نہ کسی صورت میں مذاکرات کا راستہ کھلنا چاہیے۔ انہوں نے حکومت کے رویے کو غلط قرار دیتے ہوئے کہا کہ ملک پہلے ہی سنگین مسائل سے دوچار ہے اور ان میں مسلسل اضافہ ہو رہا ہے۔

چیئرمین پی ٹی آئی نے مزید کہا کہ سال ختم ہونے سے پہلے ملاقات ضرور ہونی چاہیے تاکہ حالات میں بہتری کی کوئی صورت نکل سکے۔ انہوں نے واضح کیا کہ بہنوں کی ملاقات پر سیاست نہیں ہونی چاہیے اور بشریٰ بی بی کی فیملی کو ملاقات کی اجازت ملنی چاہیے، کیونکہ ملاقات نہ ہونے کی وجہ سے عوام میں غلط پیغام جا رہا ہے جو مزید پیچیدگیاں پیدا کر سکتا ہے۔