8

خیبر پختونخوا میں سیاحت کے فروغ کے لیے بڑے اقدامات؛ پشاور اور اسلام آباد ایئرپورٹس پر ٹورسٹ انفارمیشن ڈیسک قائم کرنے کی ہدایت

گورنر خیبر پختونخوا کے مشیر برائے سیاحت، ثقافت، آثار قدیمہ و عجائب گھر ڈاکٹر سرفراز علی نے کہا ہے کہ بیرونِ ممالک سے آنے والے سیاحوں کی رہنمائی کے لیے پشاور اور اسلام آباد کے ہوائی اڈوں پر جدید ٹورسٹ انفارمیشن ڈیسک کا قیام وقت کی اہم ضرورت ہے۔ خیبر پختونخوا کلچر اینڈ ٹورازم اتھارٹی کے کانفرنس روم میں منعقدہ ایک اعلیٰ سطحی بریفنگ سے خطاب کرتے ہوئے انہوں نے صوبے کے سیاحتی مقامات پر جاری ترقیاتی منصوبوں کو مقررہ وقت کے اندر جلد از جلد مکمل کرنے کی ہدایت جاری کی۔

  • ایئرپورٹس پر معلوماتی مراکز اور سہولت سینٹرز: مشیر سیاحت ڈاکٹر سرفراز علی نے ہدایت کی کہ ایئرپورٹس پر قائم کیے جانے والے ٹورسٹ ڈیسک پر جدید معلوماتی اسکرینز کے ساتھ سیاحتی مقامات کے پمفلٹس اور بروشرز کی دستیابی یقینی بنائی جائے۔ اس کے علاوہ صوبے کے مختلف اضلاع میں ٹورسٹ سہولت مراکز تعمیر کیے جائیں تاکہ سیاحوں کو آرام گاہ اور معلومات ایک ہی چھت تلے میسر آ سکیں۔

  • ہوٹلز کی رجسٹریشن اور رینکنگ: ڈائریکٹر جنرل ٹورازم اتھارٹی شاہد خان مہمند نے بریفنگ دیتے ہوئے بتایا کہ صوبے بھر کے سیاحتی مقامات پر موجود 5 ہزار سے زائد ہوٹلز اور ریسٹورنٹس کی رجسٹریشن مکمل کر لی گئی ہے جس سے گزشتہ چند ماہ میں ریکارڈ آمدن حاصل ہوئی ہے، جبکہ ضلع سوات میں رجسٹریشن مہم بدستور جاری ہے۔ مشیر سیاحت نے ٹورسٹ سروسز ونگ کی کارکردگی کو سراہتے ہوئے ضلعی سطح پر ایس او پیز (SOPs) تشکیل دینے اور ہوٹلز کی درجہ بندی (رینکنگ) کا عمل یقینی بنانے پر زور دیا۔

  • میزبان پراجیکٹ اور ایڈونچر ٹورازم: ڈی جی ٹورازم اتھارٹی کے مطابق ’میزبان پراجیکٹ‘ کے تحت اب تک 41 مقامی افراد دو کمروں پر مشتمل گیسٹ ہاؤس مکمل کر کے کامیابی سے چلا رہے ہیں۔ مزید برآں، چترال اور سوات میں پیراگلائیڈنگ اور راک کلائمبنگ سمیت ایڈونچر ٹورازم کے 6 تربیتی سیشنز مکمل کیے جا چکے ہیں، جبکہ موسمِ سرما میں طلباء و طالبات کو آئس ہاکی اور سنو بورڈنگ کی تربیت بھی فراہم کی جائے گی۔

  • 14 نئے سیاحتی مقامات اور عالمی ایونٹس: اجلاس میں بتایا گیا کہ صوبے میں 14 نئے سیاحتی مقامات کی تعمیر اور آبشاروں کے قریب سیاحوں کے لیے آرام گاہیں بنانے کا کام تیزی سے جاری ہے، جبکہ نشتر ہال پشاور میں ٹورسٹ سہولت مرکز اور اسٹالز آئندہ ماہ تک مکمل کر لیے جائیں گے۔ ڈاکٹر سرفراز علی نے اس عزم کا اظہار کیا کہ تریچ میر سمٹ کی طرز پر فلک سر سمٹ کو بھی عالمی سطح پر متعارف کرایا جائے گا اور صوبے میں بین الاقوامی پیراگلائیڈنگ ایونٹ کا انعقاد کیا جائے گا۔