وفاقی حکومت نے ایل این جی کی خریداری کے لیے ایک بار پھر کوشش شروع کردی ہے اور دسمبر 2026 اور جنوری 2027 کے لیے ایل این جی کے 2 اسپاٹ کارگوز خریدنے کی غرض سے نیا ٹینڈر جاری کردیا ہے۔ عالمی کمپنیوں سے 18 نومبر تک بولیاں طلب کرلی گئی ہیں۔
ذرائع کے مطابق نئے ٹینڈر کے تحت موصول ہونے والی بولیاں 18 نومبر کو ہی کھولی جائیں گی۔ ایک ایل این جی کارگو کی سپلائی 14 سے 16 دسمبر جبکہ دوسرے کارگو کی فراہمی 9 سے 11 جنوری 2027 کے لیے طلب کی گئی ہے۔
مہنگی بولیوں کے باعث سابقہ ٹینڈر مسترد
ذرائع کا کہنا ہے کہ اس سے قبل وفاقی حکومت نے ایل این جی کے 2 اسپاٹ کارگوز کی خریداری کے لیے عالمی کمپنیوں سے بولیاں طلب کی تھیں، تاہم موصول ہونے والی مہنگی پیشکشوں کے باعث انہیں مسترد کردیا گیا تھا۔
گزشتہ ٹینڈر کے دوران مجموعی طور پر دونوں کارگوز کے لیے 3 بولیاں موصول ہوئی تھیں، جن میں دسمبر کی سپلائی کے لیے فی ایم ایم بی ٹی یو 27.27 ڈالر سے 31 ڈالر تک کی قیمتیں پیش کی گئی تھیں۔
جنوری کی سپلائی کیلئے بھی مہنگی بولی موصول ہوئی تھی
ذرائع کے مطابق جنوری 2027 میں ایل این جی کی فراہمی کے لیے صرف ایک کمپنی نے بولی جمع کرائی تھی، جس میں فی ایم ایم بی ٹی یو 27.01 ڈالر کی قیمت پیش کی گئی تھی۔
حکومت نے مہنگی بولیوں کو مسترد کرنے کے بعد اب نئے سرے سے عالمی کمپنیوں سے پیشکشیں طلب کرلی ہیں تاکہ دسمبر اور جنوری کے لیے ایل این جی کے 2 کارگوز کی خریداری ممکن بنائی جاسکے۔
نئے ٹینڈر کے ذریعے حکومت عالمی مارکیٹ سے مسابقتی نرخوں پر ایل این جی حاصل کرنے کی کوشش کررہی ہے، جبکہ 18 نومبر کو بولیاں کھلنے کے بعد قیمتوں اور خریداری سے متعلق صورتحال واضح ہوگی۔