.jpg)
لاہور قلندرز نے بنگلادیش کے سابق کپتان امین الاسلام کو لاہور قلندرز ہائی پرفارمنس سینٹرز کا ایڈوائزر مقرر کردیا ہے۔ وہ نوجوان کرکٹرز کی تربیت، جدید کوچنگ کے طریقوں اور کھلاڑیوں کی صلاحیتوں کو نکھارنے میں اپنا تجربہ فراہم کریں گے۔
لاہور قلندرز کے ترجمان کے مطابق امین الاسلام ایڈوائزری کردار میں ہائی پرفارمنس سینٹرز کے لیے تجاویز دیں گے، جبکہ نوجوان کھلاڑیوں کو بین الاقوامی سطح تک پہنچانے کے لیے بھی رہنمائی فراہم کریں گے۔
امین الاسلام کو بین الاقوامی کرکٹ اور کرکٹ ڈویلپمنٹ کا وسیع تجربہ حاصل ہے۔ وہ 2015 سے 2025 تک انٹرنیشنل کرکٹ کونسل میں ایشیا کے کرکٹ ڈویلپمنٹ منیجر کے طور پر خدمات انجام دیتے رہے، جبکہ ایشین کرکٹ کونسل میں بھی کرکٹ ڈویلپمنٹ آفیسر رہ چکے ہیں۔
وہ بنگلادیش کرکٹ بورڈ کے صدر کی حیثیت سے بھی ذمہ داریاں ادا کرچکے ہیں۔ بطور کھلاڑی انہوں نے 1988 سے 2002 تک بنگلادیش کی نمائندگی کی اور بین الاقوامی کرکٹ میں نمایاں مقام حاصل کیا۔
نوجوان کرکٹرز کی ترقی پر خصوصی توجہ
لاہور قلندرز انتظامیہ کا کہنا ہے کہ امین الاسلام کا تجربہ ہائی پرفارمنس سینٹرز کی بہتری، نوجوان ٹیلنٹ کی تلاش اور کھلاڑیوں کی پیشہ ورانہ تربیت میں اہم کردار ادا کرے گا۔
ان کی تقرری سے پاکستان اور بنگلادیش کے درمیان کرکٹ ڈویلپمنٹ کے شعبے میں تعاون اور مواقع بڑھانے میں بھی مدد ملنے کی توقع ہے۔
لاہور قلندرز کے مطابق اس اقدام کا مقصد نوجوان کھلاڑیوں کو جدید تربیتی سہولیات اور بین الاقوامی معیار کے مطابق رہنمائی فراہم کرنا ہے تاکہ انہیں عالمی سطح پر اپنی صلاحیتیں منوانے کے بہتر مواقع میسر آسکیں۔