متحدہ عرب امارات کی سمندری حدود میں سرکاری تیل کمپنی ایڈنوک کے ایک آئل ٹینکر کو حملے کا نشانہ بنایا گیا، جس کے نتیجے میں جہاز کو نقصان پہنچا، جبکہ ایران کے پاسداران انقلاب نے آبنائے ہرمز میں دو آئل ٹینکرز میں دھماکوں کے بعد آگ لگنے کا دعویٰ کیا ہے۔
برطانوی اخبار دی نیشنل کے مطابق ایڈنوک کے جہاز پر حملہ منگل کی سہ پہر متحدہ عرب امارات کی سمندری حدود میں ہوا۔ کمپنی نے تصدیق کی ہے کہ اس کے ایک جہاز کو نقصان پہنچا ہے، تاہم جہاز کی شناخت، نقصان کی نوعیت اور عملے کی صورت حال سے متعلق تفصیلات جاری نہیں کی گئیں۔
متحدہ عرب امارات کی سرکاری خبر رساں ایجنسی وام کے مطابق ایڈنوک لاجسٹکس اینڈ سروسز نے واقعے کی تصدیق کرتے ہوئے کہا ہے کہ مزید معلومات سامنے آنے پر آگاہ کیا جائے گا۔
آبنائے ہرمز میں دو آئل ٹینکرز میں دھماکے اور آگ لگنے کا دعویٰ
دوسری جانب ایران کے پاسداران انقلاب نے دعویٰ کیا ہے کہ آبنائے ہرمز سے مبینہ طور پر غیر مجاز راستوں سے گزرنے کی کوشش کرنے والے دو آئل ٹینکرز دھماکوں کے بعد آگ کی لپیٹ میں آگئے۔
ایرانی حکام کے مطابق دونوں جہازوں کو روک لیا گیا ہے اور وہ جل رہے ہیں۔ تاہم پاسداران انقلاب نے جہازوں کے نام، ان کے پرچم اور آپریٹر کمپنیوں کی تفصیلات جاری نہیں کیں۔
ایرانی فورسز کا دعویٰ ہے کہ ان میں سے ایک سپر ٹینکر مبینہ طور پر بحری بارودی سرنگ سے ٹکرانے کے بعد دھماکے کا شکار ہوا، جبکہ دوسرے جہاز نے امریکی فوج کی حفاظت میں ایک غیر قانونی بحری راستے سے گزرنے کی کوشش کی تھی۔
تاہم دوسرے جہاز کو پیش آنے والے واقعے کی نوعیت واضح نہیں کی گئی اور ان دعوؤں کی آزادانہ تصدیق بھی سامنے نہیں آئی۔
ایڈنوک کے جہاز پر حملے اور ایرانی دعوؤں میں تعلق واضح نہیں
یہ تاحال واضح نہیں ہوسکا کہ متحدہ عرب امارات کی سمندری حدود میں حملے کا نشانہ بننے والا ایڈنوک کا جہاز ان دو آئل ٹینکرز میں شامل تھا جن کے بارے میں ایران نے آگ لگنے کا دعویٰ کیا ہے۔
دونوں واقعات کے درمیان کسی تعلق کی بھی تصدیق نہیں ہوئی۔ ایڈنوک نے بھی حملے کا شکار ہونے والے جہاز اور عملے کی تفصیلات جاری نہیں کیں۔
رپورٹس کے مطابق حالیہ ہفتوں میں آبنائے ہرمز، عمان کے ساحل اور متحدہ عرب امارات کے قریب تجارتی جہازوں پر حملوں کے واقعات میں اضافہ ہوا ہے۔ ایران بعض واقعات کا ذمہ دار بحری بارودی سرنگوں کو قرار دیتا رہا ہے۔
آبنائے ہرمز میں بحری نقل و حرکت متاثر
عرب خلیج اور آبنائے ہرمز میں بڑھتی ہوئی کشیدگی نے عالمی بحری تجارت اور توانائی کی ترسیل کے حوالے سے خدشات پیدا کردیے ہیں۔
رپورٹس کے مطابق فروری کے اواخر میں مشرق وسطیٰ میں جنگ شروع ہونے کے بعد ایران نے آبنائے ہرمز سے گزرنے والی بحری ٹریفک پر سخت پابندیاں عائد کر رکھی ہیں۔ تہران کا مؤقف ہے کہ اس اہم آبی گزرگاہ سے صرف منظور شدہ راستوں کے ذریعے جہازوں کو گزرنے کی اجازت دی جاسکتی ہے۔
دوسری جانب امریکا نے ایرانی بندرگاہوں کی بحری ناکہ بندی نافذ کرتے ہوئے تجارتی جہازوں کو آبنائے ہرمز سے محفوظ راستہ فراہم کرنے کے اقدامات کیے ہیں۔
عالمی تیل کی سپلائی متاثر ہونے کا خدشہ
آبنائے ہرمز عرب خلیج کو خلیج عمان اور بحیرہ عرب سے ملاتی ہے اور دنیا کی اہم ترین توانائی گزرگاہوں میں شمار ہوتی ہے۔ معمول کے حالات میں دنیا کی تقریباً 20 فیصد تیل کی سپلائی اسی راستے سے گزرتی ہے۔
اس اہم بحری راستے میں کسی بھی قسم کی رکاوٹ عالمی تیل کی قیمتوں، توانائی کی منڈیوں اور بین الاقوامی تجارت کو متاثر کرسکتی ہے۔
امریکی سینٹرل کمانڈ نے گزشتہ ماہ دعویٰ کیا تھا کہ اس نے موسم گرما سے اب تک خلیجی ممالک کو آبنائے ہرمز کے ذریعے ڈیڑھ ارب بیرل تیل برآمد کرنے میں مدد فراہم کی ہے۔
ایڈنوک کے جہاز اس سے قبل بھی حملوں کا نشانہ بن چکے ہیں
ایڈنوک لاجسٹکس اینڈ سروسز اس سے قبل بھی اپنے بحری جہازوں پر حملوں کی اطلاعات دے چکی ہے۔
کمپنی نے 7 اگست کو جاری بیان میں کہا تھا کہ جنگ شروع ہونے کے بعد سے آبنائے ہرمز سے گزرتے ہوئے اس کے 15 جہاز میزائلوں اور ڈرون حملوں کا نشانہ بن چکے ہیں۔ ان واقعات میں عملے کا ایک رکن ہلاک جبکہ 20 افراد زخمی ہوئے تھے۔
کمپنی کے مطابق اپنے عملے، جہازوں اور آپریشنز کے تحفظ کے لیے متحدہ عرب امارات کے متعلقہ حکام کے ساتھ مل کر حفاظتی اقدامات کیے جا رہے ہیں۔
تازہ واقعہ اس لیے بھی اہمیت اختیار کرگیا ہے کہ ایڈنوک کے جہاز پر حملہ آبنائے ہرمز کے فوری اطراف کے بجائے متحدہ عرب امارات کی اپنی سمندری حدود میں پیش آیا ہے، جس کے بعد خطے میں بحری جہازوں کی سلامتی اور عالمی توانائی کی ترسیل سے متعلق خدشات مزید بڑھ گئے ہیں۔