اڈیالہ جیل میں قید بانی پاکستان تحریک انصاف (پی ٹی آئی) عمران خان اور ان کی اہلیہ بشریٰ بی بی سے ملاقات کے لیے 6 وکلاء رہنماؤں کے ناموں پر مشتمل فہرست جیل حکام کو ارسال کردی گئی۔
تفصیلات کے مطابق پی ٹی آئی کی جانب سے عمران خان سے ملاقات کے لیے 6 وکلاء رہنماؤں کے نام جیل انتظامیہ کو بھجوائے گئے ہیں۔ بانی پی ٹی آئی سے ملاقات کے لیے منگل کا دن مختص ہے۔
فہرست میں بیرسٹر گوہر، نیاز اللہ نیازی اور خالد یوسف چوہدری کے نام شامل ہیں، جبکہ راجا مسعود الرحمان، جاوید شاہد اور تابش فاروق بھی ملاقات کرنے والے وکلاء میں شامل ہیں۔
ذرائع کے مطابق وکلاء رہنما کل بروز منگل عمران خان اور بشریٰ بی بی سے ملاقات کے لیے اڈیالہ جیل پہنچیں گے۔
دوسری جانب بشریٰ بی بی کے اہلخانہ کی جانب سے بھی ملاقات کے لیے اڈیالہ جیل آمد متوقع ہے۔
واضح رہے کہ پی ٹی آئی کی جانب سے ملاقات کے لیے وکلاء رہنماؤں کی فہرست جیل حکام کو ارسال کردی گئی ہے، تاہم ملاقات کا انعقاد جیل انتظامیہ کی اجازت اور متعلقہ ضابطہ کار سے مشروط ہوگا۔