امریکا کی نامور آگسٹا یونیورسٹی کی ایک حالیہ طبی تحقیق میں یہ بات سامنے آئی ہے کہ معمر افراد میں روزانہ ملٹی وٹامنز کا باقاعدہ استعمال نہ صرف بڑھاپے میں عمومی صحت کو برقرار رکھتا ہے بلکہ دل کے متعدد خطرات اور عوارض سے بچاؤ میں بھی انتہائی معاون ثابت ہوتا ہے۔
تحقیق کے دوران ماہرین نے 60 سال یا اس سے زائد عمر کے 16 ہزار سے زائد ایسے افراد کے طبی ڈیٹا کا جائزہ لیا جو تجربے کے آغاز میں امراضِ قلب سے مکمل طور پر محفوظ تھے۔ ان افراد کو مختلف گروپس میں تقسیم کر کے مسلسل 3 سال تک ملٹی وٹامنز، کوکو ایکسٹریکٹ اور پلیسبو (مصنوعی گولی) کا استعمال کرایا گیا۔ سالانہ بنیادوں پر کیے گئے سائنسی تجزیے سے معلوم ہوا کہ ملٹی وٹامنز کا مستقل استعمال دل کو صحت مند رکھتا ہے اور گردن سے دماغ تک خون پہنچانے والی مرکزی شریان کے سکڑنے کی رفتار کو سست کر دیتا ہے۔
محققین کے مطابق ملٹی وٹامنز جسم میں ضروری منرلز کی کمی کو پورا کر کے خلیات اور شریانوں کے افعال کو بہتر بناتے ہیں۔ اگرچہ ماہرین کے نزدیک حتمی نتائج کے لیے مزید مطالعہ ضروری ہے، تاہم موجودہ شواہد معمر افراد کے معیارِ زندگی اور قلبی صحت میں بہتری کی واضح نشاندہی کرتے ہیں۔