سر اور گردن کے کینسر کا عالمی دن: جوان افراد اور غیر تمباکو نوش طبقے میں بڑھتے کیسز پر طبی ماہرین کی تشویش

دنیا بھر میں 27 جولائی کو سر اور گردن کے کینسر کا عالمی دن منایا گیا، جس کا بنیادی مقصد اس موذی بیماری، اس کی وجوہات اور بروقت علاج کے حوالے سے عوامی شعور بیدار کرنا ہے۔

طبی ماہرین کا کہنا ہے کہ ماضی میں یہ تاثر عام تھا کہ سر اور گردن کا کینسر صرف سگریٹ اور تمباکو نوشی کے عادی معمر افراد کو ہی لاحق ہوتا ہے، تاہم اب اس میں ایک ڈرامائی اور تشویشناک تبدیلی دیکھنے میں آ رہی ہے۔ حالیہ اعداد و شمار کے مطابق، یہ کینسر اب ایسے جوان افراد میں بھی تیزی سے پھیل رہا ہے جنہوں نے کبھی تمباکو یا الکحل کا استعمال نہیں کیا۔ ماہرین کے مطابق تمباکو کے علاوہ ایچ پی وی (HPV) انفیکشن بھی اس کینسر کے پھیلاؤ کی ایک بڑی وجہ بن رہا ہے، جو منہ، حلق، ٹانسلز اور زبان کے حصوں کو متاثر کرتا ہے۔

طبی ماہرین نے واضح کیا ہے کہ 9 سے 14 سال کی عمر کے بچوں کو ایچ پی وی ویکسین لگوانے سے انہیں طویل المدتی تحفظ حاصل ہو سکتا ہے۔ اس کے علاوہ تمباکو نوشی، الکحل سے گریز اور منہ کی بہترین صفائی رکھ کر اس بیماری سے بچا جا سکتا ہے۔

ماہرین نے بیماری کی ابتدائی علامات کی نشاندہی کرتے ہوئے بتایا کہ منہ میں سفید یا سرخ دھبے، زبان پر زخم جو دو ہفتوں تک ٹھیک نہ ہوں، گردن پر درد کے بغیر گلٹی، آواز میں مستقل تبدیلی، گلے کی طویل سوزش اور اچانک وزن میں کمی اس کینسر کی واضح نشانیاں ہیں۔ ماہرین کے مطابق ابتدائی مرحلے میں اسکریننگ اور تشخیص سے علاج انتہائی مؤثر ثابت ہوتا ہے۔