وفاقی حکومت نے یومِ تکبیر کے موقع پر 28 مئی کو ملک بھر میں عام تعطیل کا اعلان کر دیا ہے۔ اس دن تمام سرکاری و نیم سرکاری دفاتر، تعلیمی ادارے، اور بیشتر نجی ادارے بند رہیں گے۔
اسٹیٹ بینک اور اسٹاک مارکیٹ بھی بند
اسٹیٹ بینک آف پاکستان نے بھی 28 مئی کو عام تعطیل کا اعلان کیا ہے، جبکہ پاکستان اسٹاک ایکسچینج بھی اس روز بند رہے گی۔
ملک بھر میں خصوصی تقریبات اور ریلیاں
یومِ تکبیر کے موقع پر ملک بھر میں خصوصی تقریبات، سیمینارز اور ریلیاں منعقد کی جائیں گی، جن میں ایٹمی طاقت کے حصول میں کردار ادا کرنے والے قومی ہیروز کو خراجِ تحسین پیش کیا جائے گا۔
پاکستان کی ایٹمی صلاحیت کا تاریخی دن
یہ دن پاکستان کے ایٹمی قوت بننے کی یاد میں ہر سال منایا جاتا ہے۔ 28 مئی 1998 کو پاکستان نے بلوچستان کے علاقے چاغی میں کامیاب ایٹمی تجربات کیے اور دنیا کی ساتویں اور اسلامی دنیا کی پہلی ایٹمی طاقت بن کر ابھرا۔
سندھ حکومت کا بھی عام تعطیل کا اعلان
سندھ حکومت نے بھی 28 مئی کو عام تعطیل کا اعلان کیا ہے، جس کے تحت صوبائی دفاتر، بلدیاتی کونسلز سمیت تمام سرکاری دفاتر بند رہیں گے۔
یہ دن پاکستانی قوم کے عزم، خودداری اور دفاعی خود کفالت کی علامت ہے، جسے ہر سال ملکی سطح پر جوش و جذبے کے ساتھ منایا جاتا ہے۔