پی ایس ایل پلے آف میچز؛ ڈی آر ایس سمیت اہم ٹیکنالوجیز سے محروم

لاہور: پاکستان سپر لیگ (پی ایس ایل) کے دسویں ایڈیشن کے پلے آف مرحلے کے میچز میں ڈی آر ایس اور دیگر جدید ٹیکنالوجی دستیاب نہیں ہو سکیں جس سے شائقین اور کرکٹ حلقوں میں تشویش پائی جاتی ہے۔ ذرائع کے مطابق، بھارت کے ساتھ کشیدگی کے باعث براڈکاسٹرز میں شامل ہاک آئی کا عملہ پاکستان واپس نہیں آیا، جس کے نتیجے میں پلیئر ٹریکنگ اور اسپیڈ گن جیسی سہولیات معطل رہیں۔
دونوں ممالک کے درمیان جاری کشیدگی کے باعث میچز ری شیڈول ہوئے، اور اب بقیہ مقابلے سیکیورٹی خدشات کے پیش نظر تکنیکی سہولیات کے بغیر کھیلے جا رہے ہیں۔ پی ایس ایل انتظامیہ نے اس صورتحال پر قابو پانے کے لیے متبادل منصوبے بنانے کا آغاز کر دیا ہے۔
واضح رہے کہ بھارتی جارحیت کے باعث لیگ کا یہ مرحلہ ایک ہفتے کے لیے ملتوی کیا گیا تھا، تاہم اب یہ میچز ٹیکنالوجی کی عدم دستیابی کے باوجود کھیلے جا رہے ہیں، جو کرکٹ کی شفافیت اور معیار کے لیے چیلنج ثابت ہو سکتے ہیں۔