11

پنجاب میں بلدیاتی انتخابات 2 مرحلوں میں کرانے کا فیصلہ

الیکشن کمیشن آف پاکستان نے پنجاب میں بلدیاتی انتخابات دو مراحل میں کرانے کی صوبائی حکومت کی تجویز منظور کرلی ہے، جس کے تحت پہلے مرحلے میں 18 جبکہ دوسرے مرحلے میں بھی 18 اضلاع میں انتخابات منعقد ہوں گے۔

الیکشن کمیشن کے مطابق پنجاب میں بلدیاتی انتخابات کے پہلے مرحلے کیلئے 7 فروری 2027 کی تاریخ مقرر کردی گئی ہے، جبکہ دوسرے مرحلے کے انتخابات بھی مختلف اضلاع میں کرائے جائیں گے۔

تفصیلات کے مطابق حکومت پنجاب نے 16 نومبر کو الیکشن کمیشن کو بلدیاتی انتخابات مرحلہ وار کرانے کی تجویز ارسال کی تھی، جس سے اتفاق کرتے ہوئے الیکشن کمیشن نے چیف سیکرٹری پنجاب کو باضابطہ مراسلہ جاری کردیا اور انتخابی تیاریوں کا عمل آگے بڑھانے کی ہدایت کی ہے۔

پہلے اور دوسرے مرحلے میں کون سے اضلاع شامل ہوں گے؟

الیکشن کمیشن کے فراہم کردہ شیڈول کے مطابق پہلے مرحلے میں لاہور، راولپنڈی، فیصل آباد، بہاولپور، چکوال، تلہ گنگ، سیالکوٹ، اوکاڑہ، قصور اور سرگودھا سمیت اضلاع میں انتخابات ہوں گے۔

دوسرے مرحلے میں اٹک، لیہ، ملتان، گجرات، جھنگ، خوشاب، ساہیوال، گوجرانوالہ، وزیرآباد اور میانوالی سمیت دیگر اضلاع میں پولنگ ہوگی۔

بلدیاتی انتخابات کئی برس سے تاخیر کا شکار

واضح رہے کہ پنجاب میں آخری مرتبہ بلدیاتی انتخابات 2015 میں منعقد ہوئے تھے، جبکہ منتخب بلدیاتی اداروں کی مدت 31 دسمبر 2021 کو مکمل ہوگئی تھی۔

اس کے بعد صوبائی حکومتوں کی جانب سے بلدیاتی قوانین میں تبدیلیوں اور حلقہ بندیوں کے مختلف مراحل کے باعث انتخابات کا انعقاد مسلسل مؤخر ہوتا رہا۔

حکومت پنجاب نے انتخابات کی تاریخ تبدیل کرنے کی درخواست کی تھی

حکومت پنجاب نے ابتدائی طور پر موسمی حالات اور انتظامی مشکلات کے پیش نظر بلدیاتی انتخابات اپریل 2027 میں کرانے کی درخواست کی تھی۔

صوبائی حکومت کا مؤقف تھا کہ موسم سرما میں اسموگ، شدید دھند اور خراب موسمی حالات کے باعث انتخابی سرگرمیاں متاثر ہوسکتی ہیں۔

تاہم بعد ازاں حکومت نے اپنے مؤقف میں تبدیلی کرتے ہوئے موسم بہتر ہونے کے پیش نظر جنوری یا فروری 2027 میں انتخابات کرانے کی نئی تجویز الیکشن کمیشن کو بھجوائی تھی۔

الیکشن کمیشن نے صوبائی حکومت کی درخواست اور انتظامی امور کا جائزہ لینے کے بعد پہلے مرحلے کیلئے 7 فروری 2027 کی تاریخ مقرر کردی ہے۔