.jpg)
پاکستان ٹیلی کمیونیکیشن اتھارٹی (پی ٹی اے) کے چیئرمین میجر جنرل ریٹائرڈ حفیظ الرحمان نے کہا ہے کہ پاکستان میں یوٹیوب، ٹک ٹاک اور واٹس ایپ کا استعمال تیزی سے بڑھ رہا ہے، جبکہ یوٹیوب ویڈیوز دیکھنے کے حوالے سے پاکستان دنیا میں سرفہرست ہے۔
اسلام آباد میں قومی اسمبلی کی قائمہ کمیٹی برائے انفارمیشن ٹیکنالوجی کے اجلاس کے دوران چیئرمین پی ٹی اے نے کمیٹی کو ڈیجیٹل پلیٹ فارمز کے استعمال سے متعلق اعداد و شمار پر بریفنگ دی۔
چیئرمین پی ٹی اے کے مطابق پاکستان میں ٹک ٹاک کے تقریباً 10 کروڑ صارفین کے اکاؤنٹس ہیں، جبکہ 15 کروڑ پاکستانی اس پلیٹ فارم پر ویڈیوز دیکھتے ہیں۔ انہوں نے بتایا کہ ملک میں یوٹیوب استعمال کرنے والوں کی تعداد 9 کروڑ 60 لاکھ ہے اور روزانہ تقریباً 56 کروڑ ویڈیوز دیکھی جاتی ہیں۔
انہوں نے مزید بتایا کہ پاکستان میں واٹس ایپ کے تقریباً 10 کروڑ صارفین کے اکاؤنٹس موجود ہیں۔ پاکستانی صارفین روزانہ واٹس ایپ کے ذریعے ایک ارب کالز کرتے ہیں، جبکہ روزانہ 12 ارب پیغامات بھیجے جاتے ہیں۔
پاکستان میں 5 جی سروس سے متعلق اہم پیش رفت
اجلاس کے دوران وفاقی وزیر برائے انفارمیشن ٹیکنالوجی و ٹیلی کمیونیکیشن شزا فاطمہ نے بتایا کہ سوشل میڈیا اور مصنوعی ذہانت (اے آئی) کے استعمال میں اضافے کے باعث ڈیٹا کی کھپت بھی تیزی سے بڑھ رہی ہے۔
انہوں نے کہا کہ سابق وزیراعظم نواز شریف کے دور کے بعد ملک میں اسپیکٹرم کی نیلامی نہیں ہوئی تھی۔ ان کے مطابق اس دور میں پاکستان کو 4 جی ٹیکنالوجی ملی، جبکہ موجودہ حکومت نے 5 جی اسپیکٹرم کی نیلامی کا عمل مکمل کیا۔
شزا فاطمہ کے مطابق اس وقت پاکستان میں تقریباً 18 لاکھ افراد 5 جی سروس استعمال کر رہے ہیں، جبکہ 24 شہروں میں 5 جی سروس متعارف کرائی جا رہی ہے۔ حکومت بہتر ٹیلی کام سروسز کی فراہمی کے لیے بھی اقدامات کر رہی ہے۔
ٹیلی کام سروسز میں خرابی کی وجوہات بھی سامنے آگئیں
وفاقی وزیر نے بتایا کہ ملک میں ٹیلی کام سروسز متاثر ہونے کی مختلف وجوہات ہیں۔ کئی مقامات پر ٹیلی کام ٹاورز، ڈیزل اور جنریٹرز چوری ہوجاتے ہیں، جس سے سروسز کی فراہمی میں مشکلات پیدا ہوتی ہیں۔
اجلاس میں پیش کیے گئے اعداد و شمار سے ظاہر ہوتا ہے کہ پاکستان میں ڈیجیٹل پلیٹ فارمز کا استعمال تیزی سے بڑھ رہا ہے، جبکہ 5 جی ٹیکنالوجی کے فروغ اور ٹیلی کام سروسز کی بہتری کو بھی اہمیت دی جا رہی ہے۔