پاکستان کی عسکری قیادت اور وزیر داخلہ محسن نقوی ایران کے دورے پر ہیں، جہاں فیلڈ مارشل عاصم منیر کی ایرانی صدر اور ایرانی مذاکراتی ٹیم سے الگ الگ ملاقاتیں ہوئی ہیں۔ ملاقاتوں میں خطے کی صورتحال اور امریکا ایران مذاکرات سمیت اہم امور پر تبادلہ خیال کیا گیا۔
ایرانی سرکاری میڈیا کے مطابق فیلڈ مارشل عاصم منیر نے ایرانی مذاکراتی ٹیم سے ملاقات کی، جبکہ ایرانی پارلیمنٹ کے اسپیکر محمد باقر قالیباف سے بھی ان کی ملاقات ہوئی۔ اس موقع پر وفاقی وزیر داخلہ محسن نقوی بھی موجود تھے۔
ایران کا امریکا پر عدم اعتماد کا اظہار
ایرانی خبر رساں ادارے کے مطابق ایرانی مذاکراتی ٹیم نے فیلڈ مارشل عاصم منیر سے ملاقات کے دوران امریکا پر عدم اعتماد کا اظہار کیا۔ ایران کا مؤقف ہے کہ امریکا اس کی جانب سے پیش کی گئی سات شرائط پوری کیے بغیر اعتماد بحال نہیں کرسکتا۔
ایرانی پارلیمنٹ کے اسپیکر محمد باقر قالیباف نے کہا کہ امریکا کے ماضی کے اقدامات اور ایران مخالف پالیسیوں کے باعث ایرانی عوام میں واشنگٹن کے حوالے سے گہری بداعتمادی پیدا ہوئی ہے۔
دھمکیوں سے ایران کے فیصلے تبدیل نہیں ہوں گے، قالیباف
محمد باقر قالیباف کے مطابق امریکی نائب صدر کو واضح طور پر بتایا گیا ہے کہ دھمکیوں اور فوجی نقل و حرکت سے ایران کے تزویراتی فیصلوں پر اثر نہیں پڑے گا۔
انہوں نے کہا کہ ٹرمپ انتظامیہ کی جانب سے اسلام آباد میں طے پانے والی مفاہمت کی مبینہ خلاف ورزیوں اور بار بار دی جانے والی دھمکیوں نے بداعتمادی میں مزید اضافہ کیا ہے۔
قالیباف کا کہنا تھا کہ امریکا ایران کا اعتماد اس وقت تک حاصل نہیں کرسکتا جب تک وہ نیویارک میں ایران کی جانب سے پیش کی گئی سات شرائط پوری نہیں کرتا۔
امریکا غلط اندازوں کے باعث مشکلات میں گھر گیا، ایرانی اسپیکر
ایرانی پارلیمنٹ کے اسپیکر نے مزید کہا کہ امریکا نے غلط اندازوں اور ایران کے خلاف جنگ چھیڑ کر خود کو ایک مشکل صورتحال میں پھنسا لیا ہے۔ ان کے مطابق اب واشنگٹن کی ذمہ داری ہے کہ وہ اس صورتحال سے نکلنے کے لیے ضروری اقدامات کرے۔
انہوں نے ایک بار پھر واضح کیا کہ دھمکیوں اور فوجی مشقوں سے ایران کے اسٹریٹجک فیصلے تبدیل نہیں کیے جاسکتے۔
پاکستان کی سفارتی کوششیں اہمیت اختیار کرگئیں
فیلڈ مارشل عاصم منیر اور وفاقی وزیر داخلہ محسن نقوی کا دورۂ ایران ایسے وقت میں ہورہا ہے جب امریکا اور ایران کے درمیان مذاکرات اور اعتماد کی بحالی کے معاملات توجہ کا مرکز ہیں۔
ایرانی میڈیا کی جانب سے ملاقاتوں کی تصاویر بھی جاری کی گئی ہیں، جن میں فیلڈ مارشل عاصم منیر کی ایرانی قیادت اور مذاکراتی ٹیم کے ارکان سے ملاقاتوں کی تفصیلات سامنے آئی ہیں۔ تاہم ملاقاتوں کے تمام امور اور کسی ممکنہ پیش رفت کی مکمل تفصیلات باضابطہ طور پر سامنے آنا باقی ہیں۔