پاکستان مسلم لیگ (ن) کے صدر نواز شریف نے پاکستان کی مسلح افواج کی پیشہ ورانہ مہارت اور عزم کو سراہتے ہوئے کہا کہ انہوں نے وطن کے دفاع میں مثالی کردار ادا کیا۔
جاتی امرا میں چیئرمین قائمہ کمیٹی امور خارجہ عرفان صدیقی سے ملاقات کے دوران، نواز شریف کو پارلیمانی پارٹی کی کارکردگی رپورٹ پیش کی گئی۔
اس موقع پر انہوں نے قومی سلامتی کے لیے سیاسی اختلافات کو پس پشت ڈال کر متحد ہونے کو خوش آئند قرار دیا۔ نواز شریف نے کہا کہ پارلیمنٹ نے مثبت کردار ادا کیا، عوامی نمائندوں نے قوم کے جذبات کی ترجمانی کرتے ہوئے مسلح افواج کی حوصلہ افزائی کی۔
انہوں نے اللہ تعالیٰ کا شکر ادا کرتے ہوئے اس کامیابی کو پاکستان کے لیے ایک بڑی فتح قرار دیا اور پاکستانی میڈیا کی تعریف کی، جس نے سچ پر مبنی بیانیہ دنیا کے سامنے رکھا اور دشمن کے جھوٹ کو بے نقاب کیا۔