رات کے اندھیرے میں بھارت کی بلااشتعال جارحیت کے بعد وزیراعظم کی زیر صدارت قومی سلامتی کمیٹی کا ہنگامی اجلاس منعقد ہوا۔ اس اجلاس میں پاکستان کے مکمل دفاع کا عزم ظاہر کیا گیا اور مسلح افواج کو مؤثر جوابی کارروائی کا مکمل اختیار دیا گیا۔
اجلاس میں آرمی چیف، انٹیلی جنس اداروں کے نمائندے، سروسز کے سربراہان اور وزراء نے شرکت کی۔ بریفنگ کے دوران یہ بتایا گیا کہ بھارت نے سیالکوٹ، مظفرآباد، کوٹلی اور دیگر علاقوں پر میزائل اور ڈرون حملے کیے، جن میں شہری آبادی، مساجد اور نیلم جہلم منصوبہ متاثر ہوئے۔
اجلاس میں معصوم شہداء کے لیے فاتحہ خوانی کی گئی اور زخمیوں کی صحت یابی کے لیے دعا کی گئی۔ کمیٹی نے ان حملوں کو پاکستان کی خودمختاری، عالمی قوانین اور انسانی حقوق کی کھلی خلاف ورزی قرار دیا۔
اعلامیہ میں کہا گیا کہ بھارت نے دہشتگرد کیمپوں کا جھوٹا بہانہ بنا کر حملہ کیا، حالانکہ پاکستان نے شفاف تحقیقات کی پیشکش کی تھی۔ اس حملے کو جنگی جرم قرار دیتے ہوئے عالمی برادری سے نوٹس لینے کا مطالبہ کیا گیا۔
وزیر دفاع نے یہ بھی اعلان کیا کہ وزیراعظم جلد قوم سے خطاب کریں گے اور قومی اسمبلی میں بھی اپنی بات رکھیں گے۔