ممبئی / بالی: بالی وڈ کی معروف اداکارہ نُصرت بھروچا نے انڈونیشیا کے جزیرے بالی میں حادثے کے نتیجے میں ریڑھ کی ہڈی میں فریکچر اور ممبئی میں کامیاب سرجری کے بعد پہلی بار سوشل میڈیا پر اپنی خیریت کا پیغام شیئر کیا ہے۔ اداکارہ نے غروبِ آفتاب کی تصویر کے ساتھ حوصلہ مندانہ پیغام دیتے ہوئے جلد مکمل صحت یابی کی امید ظاہر کی ہے۔
نُصرت بھروچا نے ہفتے کے روز انسٹاگرام پر ایک اسٹوری شیئر کی جس میں کھڑکی کے پاس ایک خالی ویل چیئر اور پس منظر میں خوبصورت غروبِ آفتاب کا منظر دکھائی دے رہا ہے۔ تصویر کے ساتھ انہوں نے اپنے مداحوں کے لیے لکھا کہ ’میں ہمیشہ سے غروبِ آفتاب کے خوب صورت مناظر کے پیچھے بھاگتی رہی ہوں، اچانک میرا منظر ہی بدل گیا۔ مگر، پکچر ابھی باقی ہے میرے دوست۔‘
بالی کا حادثہ اور ممبئی منتقلی
واضح رہے کہ نُصرت بھروچا اکتوبر کے آغاز میں اپنے کام اور تعطیلات کے سلسلے میں بالی میں موجود تھیں جہاں انہیں ایک شدید حادثہ پیش آیا، جس کے باعث ان کی ریڑھ کی ہڈی میں فریکچر ہو گیا تھا۔ حادثے کے فوری بعد ان کی ٹیم نے تصدیق کی تھی کہ انہیں بہتر طبی امداد کے لیے فضائی ایمبولینس کے ذریعے ممبئی منتقل کیا گیا ہے جہاں ان کی اسپتال میں ریڑھ کی ہڈی کی کامیاب سرجری کی گئی۔
میڈیکل ٹیم کے مطابق اس نوعیت کی بڑی سرجری اور چوٹ کے بعد اداکارہ کو طویل آرام اور مکمل بحالی کے لیے وقت درکار ہوگا، جس کے باعث ان کے آنے والے تمام فلمی پراجیکٹس اور کام کا شیڈول عارضی طور پر متاثر ہو سکتا ہے۔ نُصرت بھروچا نے اپنے شاندار اداکاری کے سفر میں ’پیار کا پنچ نامہ‘، ’سونو کے ٹیٹو کی سویٹی‘ اور خوفناک ہارر فلم ’چھوری‘ جیسی کامیاب فلموں میں یادگار کردار ادا کر کے بالی وڈ میں ایک منفرد مقام بنایا ہے۔