.jpg)
نائب وزیراعظم اسحاق ڈار کی زیر صدارت وزیراعظم فیول ریلیف اسکیم سے متعلق مشترکہ اجلاس منعقد ہوا، جس میں شہریوں کو سہولیات کی فراہمی، سبسڈی اسکیم پر عملدرآمد اور متعلقہ وزارتوں کے درمیان روابط بہتر بنانے کا جائزہ لیا گیا۔
اجلاس میں فیصلہ کیا گیا کہ وزیراعظم کی ہدایات کے مطابق عوام کو ریلیف فراہم کرنے کے لیے بھرپور کوششیں جاری رکھی جائیں گی۔
اجلاس کے دوران وزیراعظم فیول ریلیف اسکیم کے حوالے سے نیشنل اسٹیئرنگ کمیٹی اور میڈیا مینجمنٹ کمیٹی کی کارکردگی کا بھی جائزہ لیا گیا۔
وزارتوں کے درمیان رابطے مؤثر بنانے کی ہدایت
نائب وزیراعظم اسحاق ڈار نے متعلقہ وزارتوں کو ہدایت کی کہ باہمی روابط کو بہتر بنایا جائے اور دستیاب وسائل کو مؤثر انداز میں استعمال کرنے کو یقینی بنایا جائے، تاکہ شہریوں کو سہولیات کی فراہمی میں بہتری لائی جا سکے۔
اجلاس میں صوبائی حکومتوں، آزاد کشمیر اور گلگت بلتستان کی حکومتوں کی جانب سے پیش کی گئی تجاویز اور تعاون کو بھی سراہا گیا۔
اعلیٰ حکام کی شرکت
اجلاس میں وزیر برائے انفارمیشن ٹیکنالوجی، وزیر برائے ماحولیاتی تبدیلی، وزیر پیٹرولیم، وزیر مملکت برائے خزانہ، وزیراعظم کے معاون خصوصی اور متعلقہ وزارتوں کے اعلیٰ حکام نے شرکت کی۔
اجلاس میں فیول ریلیف اسکیم کے انتظامی امور اور مختلف حکومتی اداروں کے درمیان رابطہ کاری پر تبادلہ خیال کیا گیا۔
حکام کے مطابق اجلاس کا مقصد وزیراعظم کی ہدایات کے مطابق اسکیم پر مؤثر عملدرآمد اور شہریوں کو سہولیات کی فراہمی کے لیے متعلقہ اداروں کی کوششوں کو مربوط بنانا تھا۔