.jpg)
اسلام آباد (نیوز ڈیسک) — وفاقی حکومت اور پاکستان تحریک انصاف (پی ٹی آئی) کے درمیان مذاکراتی عمل میں پیدا ہونے والے ڈیڈلاک کے خاتمے کے لیے جے یو آئی کے سربراہ مولانا فضل الرحمان کو بطور ثالث لانے پر اتفاق ہو گیا ہے۔ حکومت اور اپوزیشن کی جانب سے باضابطہ کردار ادا کرنے کی درخواست پر مولانا فضل الرحمان نے فریقین کے سامنے 5 شرائط پیش کر دی ہیں۔ ان کا کہنا ہے کہ وہ پہلے دونوں فریقین کے مطالبات اور مسئلے کے حل میں ان کی سنجیدگی کا مکمل جائزہ لیں گے، اور بنیادی امور پر لچک دکھانے یا ایک دوسرے کے مؤقف کو تسلیم کرنے کی یقین دہانی پر ہی اپنا حتمی کردار ادا کریں گے۔ ذرائع کے مطابق مولانا کے گرین سگنل کے بعد وزیراعظم شہباز شریف سے ان کی اہم ملاقات کا بھی قوی امکان ہے۔
یاد رہے کہ اس پیشرفت سے قبل اسپیکر قومی اسمبلی ایاز صادق کی قیادت میں حکومتی وفد (جس میں رانا ثنا اللہ اور طارق فضل چوہدری شامل تھے) نے مولانا فضل الرحمان سے ملاقات کر کے انہیں ملکی سیاسی صورتحال اور وفاق کے تحفظات سے آگاہ کیا تھا، جبکہ اس سے قبل پی ٹی آئی اور اپوزیشن اتحاد کے وفد نے بھی ان سے ملاقات کی تھی۔ واضح رہے کہ 2 اکتوبر کو شروع ہونے والے مذاکرات ناکامی کے بعد ختم ہو گئے تھے، جس کے بعد پی ٹی آئی نے وزیراعلیٰ سہیل آفریدی کی قیادت میں 4 اکتوبر سے لانگ مارچ کا آغاز کر رکھا ہے۔ جہاں وزیراعظم شہباز شریف نے ایک بار پھر مذاکرات کی پیشکش کی ہے، وہیں قومی اسمبلی میں اپوزیشن لیڈر محمود اچکزئی نے واضح کیا ہے کہ مذاکرات کے لیے ان کی پہلی شرط بانی پی ٹی آئی عمران خان سے ملاقات کی اجازت ہے۔