اسلام آباد (نیوز ڈیسک) — اسلام آباد کی بینکنگ کورٹ میں بانی پاکستان تحریک انصاف اور دیگر ملزمان کے خلاف زیرِ سماعت فارن فنڈنگ کیس کی کارروائی کے دوران چالان کی اسکروٹنی کا عمل مکمل کر لیا گیا ہے، جس کے بعد عدالت نے کیس کی سماعت 28 اکتوبر تک ملتوی کر دی ہے۔
بینکنگ کورٹ کے جج عبدالغفور کاکڑ نے اس مقدمے کی سماعت کی، جبکہ فیڈرل انوسٹی گیشن ایجنسی (ایف آئی اے) کی جانب سے اسپیشل پراسیکیوٹر واثق ملک عدالت میں پیش ہوئے۔ واضح رہے کہ ایف آئی اے نے بانی پی ٹی آئی اور دیگر نامزد ملزمان کے خلاف ممنوعہ اور غیر ملکی فنڈنگ کے الزامات کے تحت یہ مقدمہ درج کر رکھا ہے، اور اب اسکروٹنی کا مرحلہ مکمل ہونے کے بعد آئندہ تاریخ پر باقاعدہ کارروائی آگے بڑھائی جائے گی۔