بھارتی اسٹار بیٹر ویرات کوہلی نے ون ڈے انٹرنیشنل کرکٹ میں ایک اور بڑا اعزاز اپنے نام کرلیا، وہ 15 ہزار رنز مکمل کرنے والے دنیا کے دوسرے بیٹر بن گئے ہیں۔
ویسٹ انڈیز کے خلاف پہلے ون ڈے میں نصف سنچری مکمل کرتے ہی ویرات کوہلی نے یہ تاریخی سنگ میل عبور کیا۔ میچ سے قبل انہیں 15 ہزار رنز مکمل کرنے کیلئے صرف 59 رنز درکار تھے۔
کوہلی نے یہ ریکارڈ اپنی 303ویں ون ڈے اننگز میں حاصل کیا، یوں انہوں نے سچن ٹنڈولکر سے 74 اننگز پہلے 15 ہزار رنز مکمل کرنے کا اعزاز حاصل کرلیا۔
سچن ٹنڈولکر نے اپنے ون ڈے کیریئر میں 463 میچز کی 452 اننگز میں 18 ہزار 426 رنز بنائے، جبکہ ویرات کوہلی اب اس فہرست میں دوسرے نمبر پر آگئے ہیں۔
15 ہزار رنز مکمل کرنے کے بعد کوہلی ون ڈے کرکٹ کے مجموعی رنز کے ریکارڈ میں صرف سچن ٹنڈولکر سے پیچھے ہیں۔ ان کے ریکارڈ میں اس سے قبل ہی 54 سنچریاں اور 79 نصف سنچریاں شامل تھیں۔
ویرات کوہلی نے ویسٹ انڈیز کے خلاف بھی شاندار ریکارڈ قائم کر رکھا ہے اور تھروواننت پورم کا میدان بھی ان کیلئے یادگار ثابت ہوا ہے، جہاں وہ اس سے قبل بڑی اننگز کھیل چکے ہیں۔
کوہلی کے اس کارنامے پر کرکٹ شائقین کی جانب سے مبارکبادوں اور نیک خواہشات کا اظہار کیا جارہا ہے، جبکہ ان کے مزید ریکارڈز کی دوڑ بھی جاری ہے۔