ڈسٹرکٹ اینڈ سیشن کورٹس اسلام آباد نے سابق وزیراعلیٰ خیبرپختونخوا علی امین گنڈاپور کے خلاف آڈیو لیک کیس میں وارنٹ گرفتاری جاری کردیئے۔
ایڈیشنل ڈسٹرکٹ اینڈ سیشن جج حاکم خان بکھر نے کیس کی سماعت کی، تاہم علی امین گنڈاپور اور شریک ملزم عدالت میں پیش نہ ہوئے۔
ملزمان کی عدم حاضری کے باعث استغاثہ کے گواہوں کے بیانات بھی ریکارڈ نہ کیے جاسکے۔ عدالت نے کیس کی مزید سماعت 17 اکتوبر تک ملتوی کردی۔
آڈیو لیک کیس کیا ہے؟
علی امین گنڈاپور کے خلاف مقدمہ تھانہ گولڑہ اسلام آباد میں درج ہے، جس کا تعلق 2022 کے پی ٹی آئی لانگ مارچ کے دوران سامنے آنے والی ایک مبینہ آڈیو سے ہے۔
مقدمے میں مبینہ آڈیو کی بنیاد پر وفاقی حکومت کے خلاف اشتعال انگیزی، دھمکیوں اور عوام کو حکومت کے خلاف اکسانے سمیت مختلف الزامات عائد کیے گئے ہیں۔ یہ الزامات عدالتی کارروائی کا حصہ ہیں اور ان کا حتمی تعین شواہد اور قانونی کارروائی مکمل ہونے کے بعد ہوگا۔
کیس میں علی امین گنڈاپور کی عدم پیشی پر ماضی میں بھی وارنٹ جاری یا برقرار کیے جاتے رہے ہیں۔ فروری 2026 میں عدالت میں پیشی کے بعد ان کے وارنٹ معطل کیے گئے تھے، جبکہ ان پر اور شریک ملزم اسد فاروق خان پر فردِ جرم بھی عائد کی گئی تھی۔