ایشین گیمز کے ہاکی مقابلوں میں پاکستان نے شاندار کارکردگی کا مظاہرہ کرتے ہوئے تھائی لینڈ کو 0-9 سے شکست دے کر فاتحانہ آغاز کردیا۔
جاپان کے شہر ایچی ناگویا میں کھیلے گئے گروپ بی کے میچ میں قومی ہاکی ٹیم نے ابتدا ہی سے جارحانہ کھیل پیش کیا اور تھائی لینڈ کے دفاع پر مسلسل دباؤ قائم رکھا۔
پاکستانی کھلاڑیوں نے عمدہ کھیل کا مظاہرہ کرتے ہوئے 9 گول اسکور کیے جبکہ تھائی لینڈ کی ٹیم کوئی گول کرنے میں کامیاب نہ ہوسکی۔
گروپ بی میں پاکستان کی مہم کا آغاز
اس کامیابی کے ساتھ پاکستان نے گروپ بی میں اپنی مہم کا جیت کے ساتھ آغاز کردیا۔ گروپ بی میں پاکستان کے علاوہ ملائیشیا، چین، عمان، ازبکستان اور تھائی لینڈ کی ٹیمیں شامل ہیں۔
پاکستان اپنا اگلا میچ 22 ستمبر کو ازبکستان کے خلاف کھیلے گا، جبکہ 24 ستمبر کو چین، 26 ستمبر کو ملائیشیا اور 28 ستمبر کو عمان کے خلاف میدان میں اترے گا۔
جاپان کے شہر ایچی ناگویا میں ایشین گیمز کی افتتاحی تقریب 19 ستمبر کو منعقد ہوئی، جبکہ مختلف کھیلوں میں 45 ممالک کے ایتھلیٹس شریک ہیں۔
پاکستانی ٹیم کی اس کامیابی کے بعد اگلے میچز میں بھی شائقین کی نظریں قومی ہاکی ٹیم کی کارکردگی پر مرکوز ہیں۔