پاکستان اور امریکا کے درمیان تجارت میں مالی سال 2026-27 کے ابتدائی دو ماہ کے دوران پاکستان کو 48 کروڑ ڈالر کا تجارتی سرپلس حاصل ہوا ہے۔
وزارت تجارت کے ذرائع کے مطابق جولائی اور اگست 2026 کے دوران پاکستان نے امریکا کو ایک ارب 17 کروڑ ڈالر کی برآمدات کیں، جبکہ اسی عرصے میں امریکا سے پاکستان کی درآمدات کا حجم 69 کروڑ ڈالر رہا۔
برآمدات میں 10 فیصد سے زائد اضافہ
ذرائع کے مطابق گزشتہ دو ماہ کے دوران امریکا کیلئے پاکستانی برآمدات میں 10.46 فیصد اضافہ ریکارڈ کیا گیا۔
دوسری جانب امریکا سے پاکستان کی درآمدات میں بھی نمایاں اضافہ ہوا اور جولائی، اگست 2026 میں درآمدات 144 فیصد بڑھ گئیں۔
گزشتہ مالی سال بھی پاکستان کو تجارتی فائدہ
وزارت تجارت کے مطابق مالی سال 2025-26 کے دوران امریکا کے ساتھ پاکستان کا تجارتی سرپلس 2 ارب 59 کروڑ ڈالر رہا۔
اس عرصے میں پاکستان کی امریکا کیلئے برآمدات 5 ارب 91 کروڑ ڈالر جبکہ امریکا سے درآمدات 3 ارب 32 کروڑ ڈالر ریکارڈ کی گئیں۔
تجارتی اعداد و شمار کے مطابق امریکا پاکستان کیلئے اہم برآمدی منڈیوں میں شامل ہے، جبکہ رواں مالی سال کے ابتدائی دو ماہ میں بھی پاکستان نے درآمدات کے مقابلے میں برآمدات کے باعث تجارتی فائدہ برقرار رکھا ہے۔