اسپین میں 2026 کے موسمِ گرما کے دوران شدید گرمی سے منسلک اموات کی تعداد 5 ہزار سے تجاوز کر گئی ہے۔
کارلوس ہیلتھ انسٹی ٹیوٹ کے مطابق 15 مئی سے 30 اگست 2026 تک تقریباً 5,232 اموات شدید درجۂ حرارت سے منسوب کی گئی ہیں، جبکہ صرف اگست میں 2,147 اموات کا ابتدائی تخمینہ لگایا گیا ہے۔
اعداد و شمار کے مطابق متاثرین میں تقریباً 5,048 افراد کی عمریں 65 سال سے زیادہ تھیں، جبکہ 85 سال سے زائد عمر کے افراد سب سے زیادہ متاثر ہوئے۔
رپورٹ کے مطابق 2026 میں شدید گرمی سے ہونے والی اموات نے 2022 کا سابقہ ریکارڈ بھی عبور کرلیا ہے۔ 2022 میں گرمی سے منسلک 4,789 اموات کا تخمینہ لگایا گیا تھا۔
حکام کے مطابق یہ اعداد و شمار موت کے سرٹیفکیٹس میں براہِ راست صرف ’’گرمی‘‘ کو وجہ قرار دینے پر مبنی نہیں، بلکہ شماریاتی تخمینہ ہیں جس سے اندازہ لگایا جاتا ہے کہ معمول سے کتنی اضافی اموات شدید درجۂ حرارت سے منسلک ہوسکتی ہیں۔
2026 کا موسمِ گرما اسپین میں غیر معمولی طور پر گرم رہا، جبکہ جولائی تاریخی ریکارڈ کے گرم ترین جولائیوں میں شامل رہا اور ملک کو شدید گرمی کی متعدد لہروں کا سامنا کرنا پڑا۔
شدید گرمی کے باعث خصوصاً بزرگ افراد کو زیادہ خطرات کا سامنا رہا، جس کے نتیجے میں گرمی سے منسلک اموات میں نمایاں اضافہ ریکارڈ کیا گیا۔