.jpg)
اسلام آباد: وزیراعظم کے مشیر برائے سیاسی امور رانا ثنااللہ نے کہا ہے کہ سپریم کورٹ کا فیصلہ آزادانہ اور میرٹ پر مبنی ہے جس پر حکومت من و عن عمل کرے گی۔ انہوں نے کہا کہ تحریک انصاف نے قانونی راستہ اختیار کرنے میں تاخیر کی، بصورتِ دیگر یہ ریلیف انہیں پہلے بھی حاصل ہو سکتا تھا۔
دوسری جانب عدالتِ عظمیٰ نے سابق وزیراعظم عمران خان کو دو روز کے اندر سخت سکیورٹی میں اسلام آباد کے نجی اسپتال منتقل کرنے کا تحریری حکم نامہ جاری کر دیا ہے۔ جسٹس شاہد وحید کی سربراہی میں تین رکنی بینچ کے مطابق بانی پی ٹی آئی کے معائنے کے لیے خصوصی میڈیکل بورڈ تشکیل دیا جائے گا، جبکہ علاج کے دوران ان کے ذاتی معالج ڈاکٹر فیصل سلطان اور بہن ڈاکٹر عظمیٰ خان ان کے ہمراہ رہیں گی۔
حکم نامے کے تحت عمران خان 16 ستمبر تک اسپتال میں زیرِ علاج رہیں گے اور انہیں ہفتے میں دو بار بیٹوں سے رابطے کی اجازت ہوگی، جبکہ ان کی میڈیکل رپورٹس عام کرنے پر پابندی عائد رہے گی۔ علاج کے تمام اخراجات فیملی برداشت کرے گی۔ دوسری طرف ایڈیشنل اٹارنی جنرل نے باضابطہ نوٹس جاری نہ کیے جانے پر اعتراض اٹھایا جسے عدالت نے عدالتی ریکارڈ کا حصہ بنا لیا ہے۔