پاکستان اور پی سی بی سلیکٹ الیون کے درمیان جاری میچ کے دوسرے روز قومی ٹیسٹ ٹیم کے کپتان بابر اعظم کو بیٹنگ کے دوران ہاتھ پر گیند لگ گئی، جس کے بعد وہ طبی امداد کیلئے گراؤنڈ سے باہر چلے گئے۔
ذرائع کے مطابق بابر اعظم کی انجری سنجیدہ نوعیت کی نہیں ہے اور ان کی حالت خطرے سے باہر ہے۔ ٹیم مینجمنٹ اور ڈاکٹرز نے بابر اعظم کا معائنہ کیا، جس کے بعد انہیں احتیاطی طور پر آرام کا مشورہ دیا گیا۔
ذرائع کا کہنا ہے کہ بابر اعظم کو بیٹنگ کے دوران ہاتھ پر گیند لگی تھی، جس کے بعد انہوں نے فوری طبی امداد حاصل کی۔ ٹیم ڈاکٹر کے معائنے کے بعد انہیں مزید آرام دینے کا فیصلہ کیا گیا تاکہ معمولی نوعیت کی چوٹ شدت اختیار نہ کرے۔
پی سی بی ذرائع کے مطابق ضرورت پڑنے کی صورت میں بابر اعظم وارم اپ میچ میں پاکستان کی جانب سے دوبارہ بیٹنگ کیلئے دستیاب ہوں گے۔ ابتدائی طور پر ان کی انجری کی صورتحال حوصلہ افزا قرار دی جا رہی ہے اور فی الحال کسی بڑی تشویش کی بات نہیں بتائی گئی۔
ذرائع کے مطابق ٹیم انتظامیہ بابر اعظم کی صحت اور فٹنس پر مسلسل نظر رکھے ہوئے ہے۔ انجری کا دوبارہ جائزہ لینے کے بعد آئندہ میچز میں ان کی شرکت کے حوالے سے فیصلہ کیا جائے گا۔
میچ کے دوران بابر اعظم کا گراؤنڈ سے باہر جانا شائقین کیلئے تشویش کا باعث بنا، تاہم ان کی انجری سنجیدہ نہ ہونے کی اطلاعات کے بعد قومی ٹیم کے مداحوں نے اطمینان کا اظہار کیا ہے۔