.jpg)
بھارتی کرکٹر اور انڈین پریمیئر لیگ میں دہلی کیپیٹلز کی نمائندگی کرنے والے ابھشیک پورل کو ایک میڈیکل طالبہ کی شکایت پر گرفتار کرلیا گیا۔
بھارتی میڈیا کے مطابق پولیس نے بتایا کہ ابھشیک پورل کے خلاف رواں سال جون میں ایک میڈیکل طالبہ کی شکایت پر مقدمہ درج کیا گیا تھا، جس میں مبینہ زیادتی، مجرمانہ دھمکیوں اور دیگر سنگین الزامات عائد کیے گئے۔
شکایت کنندہ خاتون کے مطابق وہ گزشتہ تین برس سے کرکٹر کے ساتھ تعلقات میں تھیں۔ خاتون نے الزام عائد کیا کہ ابھشیک پورل نے ان سے شادی کا وعدہ کیا اور اسی یقین دہانی کے بعد دونوں کے درمیان جسمانی تعلق قائم ہوا، تاہم بعد میں کرکٹر نے شادی سے انکار کرتے ہوئے فاصلہ اختیار کرنا شروع کردیا۔
خاتون نے اپنی شکایت میں یہ بھی الزام عائد کیا کہ ابھشیک پورل نے انہیں تشدد کا نشانہ بنایا اور مبینہ طور پر مجرمانہ دھمکیاں دیں۔ شکایت موصول ہونے کے بعد پولیس نے معاملے کی تحقیقات شروع کردی تھیں۔
رپورٹس کے مطابق کلکتہ ہائی کورٹ نے پولیس کو مقدمے میں ابھشیک پورل کی گرفتاری کی ہدایت کی، جس کے بعد پولیس نے کارروائی کرتے ہوئے کرکٹر کو حراست میں لے لیا۔
دوسری جانب ابھشیک پورل ماضی میں ان پر عائد الزامات کی تردید کرچکے ہیں۔ شکایت کنندہ کی جانب سے لگائے گئے الزامات کی قانونی طور پر حتمی تصدیق تاحال نہیں ہوئی اور پولیس کی تحقیقات جاری ہیں۔
27 سالہ بائیں ہاتھ کے بلے باز ابھشیک پورل 2023 سے آئی پی ایل میں دہلی کیپیٹلز کی نمائندگی کر رہے ہیں۔ گزشتہ سیزن میں انہوں نے ٹیم کی جانب سے چار اننگز میں 108 رنز بنائے تھے۔
مقدمے کی مزید تحقیقات اور عدالتی کارروائی مکمل ہونے کے بعد ہی الزامات کی حقیقت اور قانونی حیثیت واضح ہوسکے گی۔