پاکستان اور جنوبی کوریا کے درمیان کھیلی گئی چار میچوں کی بین الاقوامی ہاکی سیریز کے چوتھے اور آخری میچ میں جنوبی کوریا نے پاکستان کو 2 کے مقابلے میں 6 گول سے شکست دے دی۔ تاہم، آخری میچ میں ناکامی کے باوجود قومی ہاکی ٹیم نے سیریز مجموعی طور پر 1-3 کی شاندار برتری کے ساتھ اپنے نام کر لی۔
آخری میچ میں جنوبی کوریا نے آغاز سے ہی جارحانہ کھیل کا مظاہرہ کیا۔ کورین ٹیم نے پہلے کوارٹر میں 2 گول اسکور کر کے پیش قدمی حاصل کی۔ دوسرے کوارٹر میں پاکستانی ٹیم نے ایک گول کر کے خسارہ کم کرنے کی کوشش کی، لیکن تیسرے کوارٹر میں جنوبی کوریا نے مزید 3 گول داغ کر اپنی برتری کو مستحکم کر دیا۔ پاکستان نے تیسرے کوارٹر میں بھی 1 گول اسکور کیا، جبکہ چوتھے کوارٹر میں جنوبی کوریا نے ایک اور گول کر کے میچ کا حتمی اسکور 2-6 کر دیا۔
پاکستان ہاکی ٹیم انتظامیہ کے مطابق چوتھے میچ میں مستقبل کی حکمتِ عملی اور انڈر 21 جونیئر کھلاڑیوں کو بین الاقوامی سطح کا تجربہ فراہم کرنے کے لیے زیادہ موقع دیا گیا تھا۔ جونیئر کھلاڑیوں کو میدان میں اتارنے کا مقصد آنے والے اہم بین الاقوامی ٹورنامنٹس کے لیے نوجوان ٹیلنٹ کو تیار کرنا تھا۔