مہنگائی کی شرح بڑھنے کا خدشہ، وزارتِ خزانہ کی رپورٹ سامنے آگئی

اسلام آباد: وزارت خزانہ پاکستان نے ماہانہ معاشی آؤٹ لک رپورٹ جاری کر دی ہے جس میں اپریل کے دوران مہنگائی میں اضافے کا امکان ظاہر کیا گیا ہے۔

رپورٹ کے مطابق اپریل میں مہنگائی کی شرح 8 سے 9 فیصد کے درمیان رہنے کا تخمینہ ہے، جبکہ مارچ میں یہ شرح 7.30 فیصد ریکارڈ کی گئی تھی۔

وزارت خزانہ کا کہنا ہے کہ علاقائی کشیدگی کے باوجود پاکستان کی معیشت مجموعی طور پر مستحکم دکھائی دے رہی ہے۔ رپورٹ میں کہا گیا ہے کہ جغرافیائی اور سیاسی غیر یقینی صورتحال کے باوجود اہم معاشی اشاریے برقرار ہیں۔

اعداد و شمار کے مطابق بڑی صنعتوں (LSM) میں مسلسل بہتری دیکھی جا رہی ہے، جبکہ آٹو موبائل سیکٹر میں نمایاں بحالی ریکارڈ کی گئی ہے۔ اسی طرح سیمنٹ کی ترسیل میں اضافہ اس بات کی نشاندہی کرتا ہے کہ ملکی طلب میں بہتری آ رہی ہے۔

رپورٹ میں کہا گیا ہے کہ مثبت معاشی رجحانات کی بنیاد پر آئندہ مہینوں میں معاشی سرگرمیوں کے مزید مستحکم رہنے کی توقع ہے۔

وزارت خزانہ کے مطابق مشرق وسطیٰ میں جاری کشیدگی کے باعث سپلائی چین میں مسائل پیدا ہوئے ہیں، جس کے نتیجے میں عالمی اجناس کی قیمتوں میں اضافہ دیکھا گیا ہے۔

رپورٹ میں یہ بھی بتایا گیا ہے کہ قیمتوں میں اضافے اور سپلائی رکاوٹ جیسے خطرات موجود ہیں، تاہم ترسیلات زر اور آئی ٹی برآمدات میں اضافہ بیرونی شعبے کو مستحکم رکھنے میں مدد دے رہا ہے۔

مجموعی طور پر وزارت خزانہ نے کہا ہے کہ معیشت اپنی ترقی کی رفتار برقرار رکھنے کے لیے بہتر پوزیشن میں ہے، جبکہ بروقت حکومتی پالیسیاں ممکنہ منفی اثرات کو کم کرنے میں معاون ثابت ہو سکتی ہیں۔