ماہرین صحت نے خبردار کیا ہے کہ نمک (سوڈیم) کا زیادہ استعمال نہ صرف ہائی بلڈ پریشر کا باعث بنتا ہے بلکہ نئی تحقیق کے مطابق یہ دل کی ناکامی کے خطرے کو بھی بڑھا سکتا ہے۔
وینڈربلٹ یونیورسٹی کے محققین کی تحقیق میں امریکا کے جنوب مشرقی علاقوں سے تعلق رکھنے والے 25,300 سے زائد افراد کا جائزہ لیا گیا۔ تحقیق کے مطابق شرکاء اوسطاً تجویز کردہ مقدار سے تقریباً 2 گنا زیادہ نمک استعمال کر رہے تھے، جس کے نتیجے میں دل کی نئی بیماریوں کے خطرے میں 15 فیصد تک اضافہ دیکھا گیا۔
ماہرین کے مطابق روزانہ نمک کے استعمال میں ہر اضافی 1000 ملی گرام سے دل کی ناکامی کے خطرے میں 8 فیصد اضافہ ہو سکتا ہے، چاہے موٹاپا، کولیسٹرول یا بلڈ پریشر جیسے عوامل موجود ہوں۔ امریکن ہارٹ ایسوسی ایشن کے مطابق روزانہ سوڈیم کا استعمال 2300 ملی گرام تک محدود رہنا چاہیے، جبکہ تحقیق میں شامل افراد اوسطاً 4269 ملی گرام نمک استعمال کر رہے تھے۔
ماہرین نے مشورہ دیا کہ نمک کے استعمال میں معمولی کمی دل کی بیماریوں کے خطرات کو نمایاں حد تک کم کر سکتی ہے، تاہم کم آمدنی والے طبقات میں صحت مند خوراک تک محدود رسائی ایک بڑی رکاوٹ ہے۔