.jpg)
کراچی: ایف آئی اے نے سوشل میڈیا پر وائرل ہونے والی ایک ویڈیو کا نوٹس لیتے ہوئے بچوں کی اسمگلنگ کی کوشش کو ناکام بنا دیا۔ واقعہ 2025 میں جناح انٹرنیشنل ایئرپورٹ کراچی کا ہے، جہاں خاتون مسافر کرن سہیل اپنے اہل خانہ کے ہمراہ موزمبیق جا رہی تھیں۔
ایمیگریشن کلیئرنس کے دوران، مسافر کے دستاویزات میں تضادات پائے گئے جس کے بعد انہیں روکا گیا۔ مزید جانچ میں ایک کمسن بچہ خاتون سے حیاتیاتی طور پر متعلق نہ پایا گیا۔ یہ بچہ غیر قانونی طور پر خاتون کے حوالے کیا گیا تھا تاکہ اسے اسمگل کیا جا سکے۔
تحقیقات میں جعلی دستاویزات اور متعدد افراد کی ملی بھگت کا انکشاف ہوا، جس سے یہ بات سامنے آئی کہ یہ ایک منظم بچوں کی اسمگلنگ کی کوشش تھی۔ ایف آئی اے امیگریشن نے بروقت کارروائی کرتے ہوئے مسافروں کو آف لوڈ کر دیا۔ کیس مزید کارروائی کے لیے اے ایچ ٹی سی کراچی کے حوالے کر دیا گیا۔
ترجمان ایف آئی اے نے کہا کہ بروقت کارروائی سے بچوں کی اسمگلنگ کی کوشش ناکام بنائی گئی۔ انہوں نے عوام سے غیر مصدقہ معلومات پھیلانے سے گریز کرنے کی اپیل کی اور کہا کہ ایف آئی اے انسانی اسمگلنگ کے خاتمے اور کمزور طبقات کے تحفظ کے لیے پرعزم ہے۔