عماد عرفانی نے حالیہ پروگرام میں گفتگو کرتے ہوئے بتایا کہ ایک ڈرامے کی شوٹنگ مکمل ہونے کے بعد انہوں نے اپنا ہیئر اسٹائل تبدیل کرنے کا فیصلہ کیا اور بال بڑھانا شروع کیے۔ اس کے بعد وہ انگلینڈ روانہ ہوئے، جہاں انہوں نے لارڈز میں شاہد آفریدی فاؤنڈیشن کے لیے ایک چیریٹی فوٹو شوٹ میں حصہ لیا۔
اداکار کے مطابق جب ان تصاویر کو سوشل میڈیا پر شیئر کیا گیا تو صارفین کی جانب سے ان کا موازنہ عمران خان سے کیا جانے لگا اور دیکھتے ہی دیکھتے یہ موضوع بحث بن گیا۔
عماد عرفانی نے اس موازنے کو اپنے لیے اعزاز قرار دیتے ہوئے کہا کہ عمران خان کی شخصیت نہایت کرشماتی ہے، اور جب وہ کسی فریم میں موجود ہوں تو توجہ خود بخود انہی کی طرف مرکوز ہو جاتی ہے۔ ان کے مطابق یہ کیفیت کچھ اسی طرح کی ہوتی ہے جیسے بعض اداکار اپنی موجودگی سے ہی لوگوں کی توجہ اپنی جانب کھینچ لیتے ہیں، مثال کے طور پر امیتابھ بچن۔
سوشل میڈیا صارفین نے عماد عرفانی کے انداز اور شخصیت کو سراہتے ہوئے انہیں عمران خان کی بایوپک کے لیے موزوں قرار دیا، تاہم بعض صارفین نے یہ بھی کہا کہ عمران خان کی شخصیت اپنی مثال آپ ہے اور ان کا حقیقی معنوں میں کوئی متبادل نہیں۔