جیٹ فیول کی قیمت میں 150 فیصد اضافہ: پی آئی اے بند ہونے کا خطرہ، ملکی پروازوں کے ٹکٹ کی قیمتیں 10 سے 15 ہزار روپے بڑھ گئے

پاکستان انٹرنیشنل ایئرلائنز (پی آئی اے) کے چیئرمین عارف حبیب نے خبردار کیا ہے کہ حالیہ جیٹ فیول کی قیمتوں میں 150 فیصد اضافے کے بعد قومی پرچم بردار ایئر لائن کے آپریشنز غیر پائیدار ہو سکتے ہیں۔

عارف حبیب نے ایک انٹرویو میں کہا کہ "اگر جیٹ فیول کی قیمتیں بلند رہیں تو پی آئی اے کو بند کرنا پڑ سکتا ہے۔" انہوں نے مزید کہا کہ قومی ایئر لائن کسی طرح اس مہینے سے گزر گئی ہے، لیکن آگے بڑھتے ہوئے اضافے سے کمپنی کے لیے کام کرنا مشکل ہو جائے گا۔

 رپورٹس کے مطابق  جیٹ فیول کی قیمتیں یکم مارچ سے تقریباً 150 فیصد بڑھ گئی ہیں اور 21 مارچ سے 472 روپے فی لیٹر مقرر کی گئی ہیں، جو پہلے 388 روپے فی لیٹر تھی۔ ہوابازی کے ماہرین کے مطابق ایندھن ایئر لائن کے آپریٹنگ اخراجات کا 30 سے 40 فیصد حصہ بنتا ہے، اور جنگ کی وجہ سے قیمتوں میں اضافے نے کرایوں میں 20 سے 30 فیصد اضافہ کر دیا ہے۔

ملکی پروازوں کے ٹکٹ کی قیمتیں 10,000 سے 15,000 روپے تک پہنچ گئی ہیں، جبکہ بین الاقوامی پروازوں کے کرایے 30,000 سے 40,000 روپے تک بڑھ گئے ہیں۔ اگر عالمی تیل کی قیمتیں بڑھتی رہیں تو مزید اضافہ متوقع ہے۔

مشرق وسطیٰ میں جنگ کے آغاز کے بعد 25 مارچ تک پاکستانی ایئرلائنز کی تقریباً 325 پروازیں منسوخ کر دی گئی ہیں، جن میں سے تقریبا 200 پی آئی اے کے زیر انتظام ہیں۔ فجیرہ اور العین کے لیے پروازیں جاری ہیں، جبکہ کویت، قطر، دبئی اور بحرین کے لیے خدمات معطل ہیں۔ سعودی عرب کے لیے پروازیں شیڈول کے مطابق چل رہی ہیں۔