اسلام آباد: وفاقی حکومت نے کم آمدنی والے طبقے کو ریلیف دینے اور تیل کی کھپت کو کنٹرول کرنے کے لیے موٹر سائیکلوں، رکشوں اور 800 سی سی تک کی گاڑیوں کے لیے ایندھن کی فراہمی کا موبائل ایپلیکیشن پر مبنی کوٹہ سسٹم حتمی شکل دے دی ہے۔
حکام کے مطابق اس منصوبے کی تفصیلات آئل اینڈ گیس ریگولیٹری اتھارٹی (اوگرا)، وزارت خزانہ، وزارت پیٹرولیم اور وزارت آئی ٹی کے اشتراک سے تیار کی گئی ہیں، جس کے بعد اب اس اسکیم کے دائرہ کار سے متعلق حتمی فیصلہ کابینہ کرے گی۔
ایپ کے ذریعے ایندھن کی فراہمی کیسے ہوگی؟
حکومتی منصوبے کے تحت صارفین کو ایک مخصوص موبائل ایپ کے ذریعے رجسٹریشن کرنی ہوگی، جس میں ان کا شناختی کارڈ اور گاڑی کا رجسٹریشن نمبر لنک کیا جائے گا۔
صارفین ایپ کے ذریعے ڈیجیٹل واؤچر حاصل کریں گے، جسے پیٹرول پمپ پر اسکین یا درج کر کے تصدیق کی جائے گی۔ سسٹم خودکار طریقے سے صارف کے کوٹے کی جانچ کرے گا۔ مثال کے طور پر اگر کسی صارف کا کوٹہ 15 لیٹر ہے اور وہ 20 لیٹر طلب کرے تو اسے صرف مقررہ 15 لیٹر ہی فراہم کیا جائے گا۔
پیٹرول پمپس اور نگرانی کا نظام
حکام کا کہنا ہے کہ ہر پیٹرول پمپ پر کم از کم دو موبائل فونز کی فراہمی لازمی ہوگی تاکہ نظام بغیر کسی رکاوٹ کے چل سکے۔ اس کے علاوہ آئل مارکیٹنگ کمپنیوں کو ہر ریٹیل سائٹ کے لیے فوکل پرسن مقرر کرنا ہوگا اور 24 گھنٹے نگرانی کا نظام بھی قائم کیا جائے گا۔
سبسڈی کن گاڑیوں تک محدود ہوگی؟
ابتدائی طور پر یہ سبسڈی دو اور تین پہیوں والی گاڑیوں کے لیے مختص کی جا رہی ہے، تاہم یہ فیصلہ ابھی زیر غور ہے کہ آیا اسے چھوٹی کاروں تک بھی توسیع دی جائے یا نہیں۔
معاشی دباؤ اور پس منظر
حکام کے مطابق ملک کو ایندھن کی سپلائی اور زرمبادلہ کے حوالے سے دباؤ کا سامنا ہے، جبکہ عالمی سطح پر تیل کی قیمتوں میں اضافہ مشرقِ وسطیٰ کی کشیدہ صورتحال اور آبنائے ہرمز میں رکاوٹوں کے باعث دیکھا جا رہا ہے۔
مزید برآں، حکومت کی جانب سے پیٹرول اور ڈیزل کی قیمتوں میں دو ہفتوں تک استحکام برقرار رکھنے کی لاگت کا تخمینہ 70 ارب روپے لگایا گیا ہے، جسے بجٹ میں ہنگامی بنیادوں پر پورا کیا جا رہا ہے۔
حکام کا کہنا ہے کہ یہ نیا کوٹہ سسٹم نہ صرف مستحق طبقے کو ریلیف دے گا بلکہ ایندھن کے استعمال کو منظم کرنے میں بھی مددگار ثابت ہوگا۔