ترکیہ کی مشہور فیشن انفلوئنسر عائشہ گل ایراسلان کی اچانک اور پراسرار موت نے سوشل میڈیا اور مداحوں میں صدمے کی لہر دوڑا دی ہے۔ 27 سالہ عائشہ کو استنبول کے کاغیتھانے علاقے میں ان کے گھر پر بے ہوشی کی حالت میں پایا گیا۔
اہلخانہ کے مطابق جب وہ ان سے رابطہ نہ کر سکے تو متعلقہ حکام کو اطلاع دی گئی، جس پر ریسکیو ٹیمیں موقع پر پہنچیں اور ابتدائی معائنے کے بعد ان کی موت کی تصدیق کی گئی۔ بعد ازاں پولیس اور پراسیکیوٹر نے جائے وقوعہ کا معائنہ کیا اور لاش کو فرانزک جانچ کے لیے منتقل کر دیا تاکہ موت کی اصل وجہ معلوم کی جا سکے۔
ابتدائی تحقیقات کے دوران عمارت کی سکیورٹی فوٹیج میں ایک شخص، سونائے کُرتولوش کو گھر میں داخل اور کچھ دیر بعد باہر نکلتے ہوئے دیکھا گیا۔ پولیس نے اس شخص سے پوچھ گچھ کی تاہم بعد میں اسے چھوڑ دیا گیا۔ حکام نے بدفعلی کی تصدیق نہیں کی لیکن کیس کو مشکوک قرار دیا ہے۔
عائشہ گل ایراسلان سوشل میڈیا پر ایک نمایاں فیشن انفلوئنسر کے طور پر جانی جاتی تھیں اور ان کے لاکھوں فالوورز تھے۔ وہ ترک فیشن شوز میں بھی شرکت کر چکی تھیں، جس سے ان کی مقبولیت میں اضافہ ہوا تھا۔ فرانزک رپورٹ آنے کے بعد ہی موت کی اصل وجہ واضح ہو سکے گی۔