چین: کم عمر بچی کے ہاتھ میں موبائل فون دھماکے سے پھٹ گیا

چین میں ایک خوفناک واقعہ پیش آیا جب ایک کم عمر بچی کے ہاتھ میں موجود موبائل فون اچانک دھماکے سے پھٹ گیا۔ واقعے کا منظر گھر میں نصب سیکیورٹی کیمرے میں محفوظ ہو گیا، جس کی ویڈیو سوشل میڈیا پر تیزی سے وائرل ہو رہی ہے۔

ذرائع کے مطابق بچی صوفے پر بیٹھی موبائل فون استعمال کر رہی تھی اور فون چارجر سے منسلک تھا۔ اچانک فون زور دار دھماکے کے ساتھ پھٹ گیا جس سے بچی گھبرا گئی اور صوفے سے نیچے جا گری۔ خوش قسمتی سے بچی کسی بڑی چوٹ سے محفوظ رہی۔

ماہرین کے مطابق ایسے واقعات زیادہ گرم ہونے والی بیٹری، خراب فون یا چارجنگ کے دوران تکنیکی خرابی کی وجہ سے پیش آ سکتے ہیں۔ صارفین کو مشورہ دیا گیا ہے کہ فون استعمال کرتے وقت اور خاص طور پر چارجنگ کے دوران محتاط رہیں تاکہ کسی حادثے سے بچا جا سکے۔