ملک بھر میں سونے کی قیمتیں مستحکم

ملک بھر میں سونے کی قیمتیں آج بھی مستحکم رہیں جبکہ Pakistan Stock Exchange میں کاروبار کے اختتام پر مندی دیکھی گئی۔

آل پاکستان صرافہ بازار جیولرز ایسوسی ایشن کے مطابق فی تولہ سونا 5 لاکھ 40 ہزار 562 روپے پر برقرار رہا، جبکہ 10 گرام سونے کی قیمت 4 لاکھ 63 ہزار 444 روپے پر مستحکم رہی۔ جیولرز نے کہا کہ عالمی مارکیٹ میں نمایاں اتار چڑھاؤ نہ ہونے کے باعث مقامی سطح پر بھی قیمتوں میں استحکام دیکھا گیا۔

پاکستان اسٹاک ایکسچینج میں جمعہ کے روز مندی کا رجحان غالب رہا۔ کے ایس ای 100 انڈیکس 830 پوائنٹس کی کمی کے بعد 168,062 پوائنٹس پر بند ہوا۔ کاروباری دن کے دوران مارکیٹ میں شدید اتار چڑھاؤ دیکھا گیا، ابتدائی سیشن میں انڈیکس ایک ہزار سے زائد پوائنٹس تک گر گیا، تاہم بعد ازاں کچھ بہتری آئی لیکن اختتام پر دوبارہ مندی چھا گئی۔

اعداد و شمار کے مطابق آج 22 کروڑ سے زائد شیئرز کا لین دین ہوا، جن کی مجموعی مالیت تقریباً 18 ارب 97 کروڑ روپے رہی۔ ماہرین کے مطابق سرمایہ کار محتاط رویہ اختیار کیے ہوئے ہیں جبکہ عالمی معاشی حالات اور مقامی معاشی اشاریے مارکیٹ کی سمت کا تعین کر رہے ہیں۔