ہالی ووڈ کی معروف اداکارہ جیڈا پنکیٹ اسمتھ نے اپنے شوہر وِل اسمتھ کے سابق قریبی ساتھی بلال سلام کے خلاف اہم قانونی کارروائی شروع کر دی ہے، جس کے بعد شوبز اور سوشل میڈیا حلقوں میں ایک نئی بحث چھڑ گئی ہے۔
عدالتی دستاویزات کے مطابق اداکارہ نے کیلیفورنیا کی عدالت میں درخواست دائر کی ہے کہ بلال سلام کی جانب سے دسمبر 2025 میں دائر کیا گیا 30 لاکھ ڈالر کا مقدمہ خارج کیا جائے۔ بلال نے الزام عائد کیا تھا کہ ایک ہوٹل میں انہیں دھمکیاں دی گئیں، تاہم جیڈا نے ان الزامات کو بے بنیاد اور توجہ حاصل کرنے کی کوشش قرار دیا ہے۔
درخواست میں مؤقف اختیار کیا گیا ہے کہ مدعی کی جانب سے میڈیا پر دیے گئے بیانات بغیر کسی ٹھوس ثبوت کے ہیں اور یہ محض کردار کشی پر مبنی دعوے ہیں۔ جیڈا کے مطابق یہ تمام دعوے اسمتھ خاندان کے خلاف مبینہ عوامی مہم کا حصہ ہیں، جس کا مقصد شہرت حاصل کرنا اور دباؤ پیدا کرنا تھا۔
یہ تنازع اس وقت مزید شدت اختیار کر گیا جب بلال سلام نے پوڈکاسٹ Unwine With Tasha K میں گفتگو کے دوران چونکا دینے والے دعوے کیے، جن میں انہوں نے وِل اسمتھ کے حوالے سے مبینہ غیر اخلاقی اور مشتبہ کارروائیوں کا ذکر کیا۔ اس کے بعد معاملہ سوشل میڈیا پر بھی ٹرینڈ کرنے لگا اور مداحوں کی نظریں اس قانونی جنگ پر جم گئیں۔
دوسری جانب جیڈا نے امریکی میڈیا کو دیے گئے بیان میں واضح الفاظ میں کہا: “ہم مقدمہ کر رہے ہیں”، جس سے عندیہ ملتا ہے کہ یہ معاملہ اب عدالت میں بھرپور انداز میں لڑا جائے گا۔
ہالی ووڈ کی اس نئی قانونی کشمکش نے شوبز انڈسٹری میں ہلچل مچا دی ہے، اور آنے والے دنوں میں مزید انکشافات اور عدالت کے فیصلوں کا شدت سے انتظار کیا جا رہا ہے۔