دنیا بھر میں مصنوعی ذہانت کے شعبے میں نمایاں مقام حاصل کرنے والا چیٹ جی پی ٹی آج بھی مقبول ترین اے آئی چیٹ بوٹس میں شمار ہوتا ہے۔ اوپن اے آئی کی تیار کردہ اس ٹیکنالوجی نے نہ صرف صارفین کے سوالات کے جواب دینا آسان بنایا بلکہ ٹیکنالوجی کی سمت بھی بدل دی ہے۔
چیٹ جی پی ٹی کے ذریعے صارفین معلومات حاصل کرتے ہیں، کوڈنگ سیکھتے ہیں اور مختلف موضوعات پر رہنمائی لیتے ہیں۔ مگر اکثر افراد کے ذہن میں یہ سوال آتا ہے کہ آخر جی پی ٹی کے حروف کس چیز کی نمائندگی کرتے ہیں۔
جی پی ٹی میں جی سے مراد "جنریٹیو" ہے۔ اس کا مطلب یہ ہے کہ یہ نظام نیا متن تخلیق کر سکتا ہے۔ یہ صرف معلومات کا تجزیہ نہیں کرتا بلکہ دیے گئے تناظر کے مطابق نیا مواد تیار بھی کرتا ہے۔ جنریٹیو اے آئی دراصل ڈیپ لرننگ پر مبنی ٹیکنالوجی ہے جو انسانی دماغ کے انداز سے متاثر ہو کر کام کرتی ہے۔
پی سے مراد "پری ٹرینڈ" ہے۔ اس کا مطلب ہے کہ ماڈل کو پہلے سے وسیع ڈیٹا پر تربیت دی گئی۔ چیٹ جی پی ٹی کو اربوں ویب صفحات اور دیگر متنوع ذرائع سے حاصل کردہ مواد کے ذریعے سکھایا گیا۔ اس تربیت کے بعد اسے عام صارفین کے لیے پیش کیا گیا۔ ماہرین کے مطابق ایسے ماڈلز انسانی آراء اور فیڈ بیک سے بھی خود کو بہتر بناتے رہتے ہیں۔
ٹی کا مطلب "ٹرانسفارمر" ہے۔ یہ ایک جدید نیورل نیٹ ورک آرکیٹیکچر ہے جو متن کو چھوٹے حصوں میں تقسیم کر کے اس کا مفہوم سمجھتا اور جواب تیار کرتا ہے۔ یہی ٹیکنالوجی اسے سوالات کے سیاق و سباق کو سمجھنے کے قابل بناتی ہے۔
ماہرین کے مطابق جی پی ٹی دراصل ایک بڑا لارج لینگوئج ماڈل ہے جو ڈیپ لرننگ اور نیورل نیٹ ورکس کے ذریعے زبان کو سمجھنے اور جواب دینے کی صلاحیت رکھتا ہے۔
نام رکھنے کی کہانی بھی دلچسپ ہے۔ ایک پوڈ کاسٹ میں اوپن اے آئی کے چیف ریسرچ آفیسر مارک چن اور چیٹ جی پی ٹی کے سربراہ نک ٹرولے نے بتایا کہ ابتدائی طور پر اسے "چیٹ ود جی پی ٹی 3.5" کہا جا رہا تھا۔ تاہم تعارف سے قبل ایک میٹنگ میں نام کو سادہ بنانے کا فیصلہ کیا گیا۔ یوں "چیٹ جی پی ٹی" پر اتفاق ہوا اور یہی نام عالمی سطح پر مقبول ہو گیا۔