کراچی: معروف گلوکار عاصم اظہر نے حال ہی میں ایک تقریب کے دوران محبت کے بارے میں ایسا بیان دیا کہ سوشل میڈیا پر صارفین کے درمیان نئی بحث چھڑ گئی۔
جب ایک خاتون نے گلوکار سے سوال کیا کہ محبت ایک بار ہوتی ہے یا بار بار بھی، تو عاصم اظہر نے سنجیدہ انداز میں کہا:
"پہلے میں سمجھتا تھا کہ محبت بار بار ہو سکتی ہے، مگر اب سمجھ آیا ہے کہ محبت ایک ہی دفعہ ہوتی ہے۔"
ان کے اس جواب نے مداحوں کو حیران کر دیا اور ویڈیو کلپ تیزی سے وائرل ہو گیا۔ مداحوں نے گلوکار کے اس فکری اور سنجیدہ پہلو کو سراہا، اور سوشل میڈیا پر محبت کے حقیقی مفہوم پر بحث شروع ہو گئی۔
یہ بیان ایسے وقت میں سامنے آیا ہے جب عاصم اظہر اور اداکارہ ہانیہ عامر کے حوالے سے پہلے ہی مداحوں میں تجسس پایا جا رہا ہے۔ اس سے قبل عاصم اظہر کی اداکارہ و ماڈل میرُب علی سے تین سالہ منگنی ختم ہوئی تھی، جس پر دونوں نے نجی زندگی میں رازداری اختیار کرنے کی درخواست کی تھی۔
مداح اب سوشل میڈیا پر بحث کر رہے ہیں کہ محبت واقعی ایک بار ہی ہوتی ہے یا اس کے متعدد پہلو بھی ہو سکتے ہیں۔