صادق آباد میں دھند کے باعث بس الٹنے سے 3 افراد جاں بحق، 15 زخمی

پنجاب کے شہر صادق آباد میں جمالدین والی ائرپورٹ کے قریب شدید دھند کے باعث ایک بس الٹ گئی، جس کے نتیجے میں تین افراد جاں بحق اور 15 زخمی ہو گئے۔ حادثہ حدِ نگاہ کم ہونے کی وجہ سے پیش آیا۔

حادثے کے فوری بعد ریسکیو ٹیمیں موقع پر پہنچیں اور جاں بحق افراد کی لاشیں اور زخمیوں کو قریبی اسپتال منتقل کیا گیا، جہاں زخمیوں کو طبی امداد فراہم کی جا رہی ہے۔

دھند کے باعث پنجاب کے مختلف علاقوں میں نظامِ زندگی متاثر ہوا اور موٹروے پولیس نے حفاظتی اقدامات کے تحت کئی موٹرویز ہر قسم کی ٹریفک کے لیے بند کر دیے۔ موٹروے ایم تھری (درخانہ تا رجانہ)، ایم فور (خانیوال تا ملتان اور شورکوٹ تا عبدالحکیم) اور ایم فائیو (ملتان تا روہڑی) بند ہیں۔

موٹروے پولیس نے شہریوں کو مشورہ دیا کہ وہ غیر ضروری سفر سے گریز کریں اور اگر سفر ناگزیر ہو تو دن کے اوقات کو ترجیح دیں۔ ترجیحی اوقات صبح 10 بجے سے شام 6 بجے تک محفوظ تصور کیے گئے ہیں۔ ڈرائیور حضرات کو فوگ لائٹس کے استعمال، آگے چلنے والی گاڑی سے مناسب فاصلہ رکھنے اور لین ڈسپلن پر عمل کرنے کی ہدایت کی گئی ہے۔ رہنمائی یا مدد کے لیے ہیلپ لائن 130 بھی فعال ہے۔

محکمہ موسمیات کے مطابق اسلام آباد، راولپنڈی اور دیگر علاقوں میں آج خشک سردی برقرار رہے گی، جبکہ بالائی علاقوں میں ہلکی بارش کا امکان ہے۔ طبی ماہرین نے نزلہ، زکام اور دیگر موسمی بیماریوں سے بچاؤ کے لیے مناسب لباس اور احتیاطی تدابیر اختیار کرنے کی ہدایت دی ہے۔