گھانا کے نوجوان کی 25 دسمبر کو دنیا میں بڑی تباہی کی پیش گوئی

گھانا کی خود ساختہ نبی نما شخصیت ایبو نوح نے دعویٰ کیا ہے کہ وہ 25 دسمبر کو آنے والے عالمی طوفان سے انسانیت کو بچانے کے لیے دیو ہیکل لکڑی کی کشتیوں کی تعمیر کر رہے ہیں۔ ایبو نوح کے مطابق، یہ طوفان زمین کو تین سال تک ڈبو سکتا ہے، جبکہ عام طور پر 25 دسمبر مسیحی دنیا میں خوشی کا دن ہوتا ہے۔

ایبو نوح، جو آن لائن ایبو جیسس اور اگبو نوح کے نام سے بھی جانے جاتے ہیں، نے دعویٰ کیا ہے کہ خدا نے انہیں نوح کی میراث سنبھالنے کے لیے منتخب کیا ہے تاکہ انسانیت اور تمام حیوانات کو اس آسمانی طوفان سے بچایا جا سکے۔ وہ یہ کشتییں تعمیر کرنے کے لیے مہینوں سے سرگرم ہیں اور ویڈیوز میں لکڑی کی کشتیوں کا جائزہ لیتے یا کتاب پڑھتے دکھائی دیتے ہیں۔

ان کا کہنا ہے کہ وہ 10 کشتیوں تک تعمیر کریں گے، جن میں بعض دعوے کے مطابق کروڑوں افراد سوار ہو سکتے ہیں، حالانکہ یہ بظاہر مبالغہ معلوم ہوتا ہے۔

ایبو نوح کے سوشل میڈیا پر لاکھوں فالوورز ہیں، مگر ان کی ذاتی معلومات، حقیقی مقام اور کشتیوں کا اصل مقام غیر واضح ہیں۔ کچھ ماہرین اور صارفین نے ان کے وجود پر بھی سوال اٹھایا ہے اور بعض لوگوں کا خیال ہے کہ ان کے ویڈیوز مصنوعی ذہانت کے ذریعے تخلیق کیے گئے ہو سکتے ہیں۔

یہ پیش گوئی اور منصوبہ سوشل میڈیا پر بحث کا مرکز بن گیا ہے، اور عوام میں حیرت اور تجسس پیدا کر رہا ہے۔