پی ٹی اے نے وی پی این خدمات فراہم کرنے والی کمپنیوں کی لائسنسنگ کا آغاز کر دیا

پاکستان ٹیلی کمیونیکیشن اتھارٹی (پی ٹی اے) نے ورچوئل پرائیویٹ نیٹ ورک (VPN) سروس فراہم کرنے والی کمپنیوں کی لائسنسنگ کا عمل شروع کر دیا ہے۔ یہ لائسنسنگ اب بحال شدہ کلاس ویلیو ایڈڈ سروسز ریجیم کے تحت کی جا رہی ہے، جس کا مقصد ملک میں محفوظ اور مجاز VPN سروسز کی فراہمی کو منظم کرنا اور قومی قوانین و ڈیٹا سیکیورٹی کے معیار کو یقینی بنانا ہے۔

پی ٹی اے کی جانب سے متعدد کمپنیوں کو لائسنس جاری کیے جا چکے ہیں، جس سے صارفین اب براہِ راست ان لائسنس یافتہ سروس فراہم کنندگان سے VPN خدمات حاصل کر سکتے ہیں، بغیر یہ کہ انہیں اپنے IP ایڈریس یا موبائل نمبر کی الگ رجسٹریشن کے لیے پی ٹی اے سے رابطہ کرنا پڑے۔ اس اقدام کا مقصد صارفین کے لیے سہولت پیدا کرنا اور ریگولیٹری عمل کو آسان بنانا ہے۔

ماہرین کا کہنا ہے کہ فری اور غیر رجسٹرڈ VPN سروسز ملک میں بڑھتے ہوئے سائبر سیکیورٹی خطرات کی بڑی وجہ بن گئی ہیں۔ ان کے ذریعے صارفین کا ڈیٹا ہیکنگ، چوری، غیر ملکی نگرانی اور دیگر سائبر جرائم کے خطرات سے دوچار ہو جاتا ہے۔ اس لیے ماہرین کے مطابق محفوظ ڈیجیٹل پاکستان کے قیام کے لیے VPN سروسز پر مکمل پابندی اور لائسنسنگ وقت کی اہم ضرورت ہے۔