گجرات: خاتون کی پلکوں میں 250 زندہ جوئیں اور 85 انڈے، دو گھنٹے تک علاج جاری رہا

بھارت کی ریاست گجرات میں 66 سالہ خاتون گیتابین کی آنکھوں میں مسلسل خارش اور درد کے باعث ان کا معائنہ کیا گیا تو حیران کن انکشاف ہوا کہ ان کی پلکوں میں 250 زندہ جوئیں اور 85 انڈے موجود تھے۔

ماہر چشم ڈاکٹر مرگانک پٹیل کے مطابق یہ ایک نہایت نایاب حالت تھی جسے طبی زبان میں Phthiriasis Palpebrarum کہا جاتا ہے۔ علاج کے لیے خاص آلہ ”میکفرسن“ استعمال کیا گیا اور خاتون کی آنکھوں میں ڈراپس ڈالے گئے تاکہ تکلیف نہ ہو۔ یہ عمل تقریباً دو گھنٹے تک جاری رہا اور آخرکار تمام جوئیں اور ان کے انڈے نکال دیے گئے، جس کے بعد گیتابین کو فوراً سکون محسوس ہوا۔

ڈاکٹر پٹیل نے کہا کہ یہ کیس ان کے 21 سالہ کیریئر میں سب سے منفرد تھا۔ انہوں نے بتایا کہ جوئیں پلکوں کی باریک جلد سے خون چوستی ہیں، جس سے شدید خارش، جلن اور سوجن پیدا ہوتی ہے۔

ماہرین کا کہنا ہے کہ یہ بیماری عموماً صفائی کی کمی، پرانے بستروں یا تکیوں میں موجود جوئیں، یا جانوروں کے قریب رہنے سے لگ سکتی ہے۔ علامات میں پلکوں میں مستقل خارش، آنکھوں میں جلن یا سوجن، نیند میں دشواری اور پلکوں پر سفید ذرات شامل ہیں۔

بچاؤ کے آسان طریقے:

• دن میں دو سے تین بار چہرہ دھوئیں

• سونے سے پہلے آنکھیں صاف کریں

• تکیے، کمبل اور چادریں باقاعدگی سے دھوئیں

• خارش یا سرخی برقرار رہنے پر فوراً ماہر چشم سے رجوع کریں

علاج کے اگلے دن گیتابین کی آنکھیں مکمل طور پر صاف اور صحت مند تھیں، اور وہ کئی ہفتوں بعد سکون سے سو سکیں۔

ڈاکٹروں نے اس کیس کو نہ صرف نایاب قرار دیا بلکہ صفائی اور احتیاط کی اہمیت بھی واضح کی۔