اسلام آباد ایکسائز اینڈ ٹیکسیشن ڈیپارٹمنٹ نے بیرون ملک مقیم پاکستانیوں کے لیے ایک شاندار ڈیجیٹل سہولت متعارف کرائی ہے جس سے اب وہ دنیا کے کسی بھی کونے سے پاک آئی ڈی موبائل ایپ کے ذریعے اپنی گاڑی کی رجسٹریشن اور ٹرانسفر کا مکمل عمل انجام دے سکیں گے۔
ڈائریکٹر ایکسائز بلال اعظم کے مطابق اس انقلابی قدم سے اوورسیز پاکستانیوں کو پاکستانی سفارتخانوں کے چکر لگانے یا وکالت نامہ بھیجنے کی ضرورت نہیں رہے گی۔ اب صرف پاک آئی ڈی ایپ ڈاؤن لوڈ کریں، اپنی بائیومیٹرکس تصدیق مکمل کریں اور گاڑی کی ٹرانسفر بآسانی مکمل کریں۔ بلال اعظم نے کہا کہ ایپ کے ذریعے بائیومیٹرکس، شناخت کے ثبوت کے طور پر استعمال ہوگی اور علیحدہ ٹرانسفر آرڈر فارم کی ضرورت نہیں رہے گی۔
تاہم، انہوں نے بیچنے اور خریدنے والے دونوں سے کہا کہ قانونی تقاضوں کے مطابق اپنے دستخط شدہ ٹرانسفر لیٹر لازمی مکمل کریں۔ یہ جدید قدم حکومتِ پاکستان کی ڈیجیٹلائزیشن پالیسی کی ایک بڑی کامیابی ہے جو اوورسیز پاکستانیوں کو اپنے وطن کے ساتھ پہلے سے زیادہ جڑے رہنے کا موقع فراہم کرتی ہے۔