گرین ٹاؤن میں آصف کے قتل کا معمہ حل ہو گیا ہے، پولیس نے بتایا کہ مقتول کو اس کی بیوی قیصرہ اور آشنا رضوان شاہ نے مل کر قتل کیا۔
پولیس ذرائع کے مطابق، قیصرہ نے رضوان شاہ کے ساتھ منصوبہ بندی کر کے آصف کو اس کے کارخانے میں قتل کرنے کا ارادہ کیا۔ رضوان شاہ مقتول کے پاس کام کرتا تھا اور اسی دوران دونوں کے درمیان تعلقات قائم ہوگئے تھے۔
قتل کے بعد مقتول کی لاش کو موٹر سائیکل پر رکھ کر پتوکی کے قریب نہر میں پھینک دیا گیا۔ پولیس کے مطابق قیصرہ قتل کے بعد رضوان سے شادی کرنا چاہتی تھی۔
مزید برآں، مقتول کے لاپتا ہونے کا مقدمہ 23 اکتوبر کو قیصرہ نے خود درج کرایا تاکہ شک اس سے ہٹ جائے، تاہم تحقیقات کے دوران شواہد اور بیانات میں تضادات سامنے آئے۔ پولیس نے قیصرہ اور رضوان شاہ کو حراست میں لے لیا اور تفتیش جاری ہے۔
مقتول کی لاش اب نہر سے برآمد کر لی گئی ہے اور پولیس نے مزید قانونی کارروائی شروع کر دی ہے۔